بی جے پی ممبران پارلیمنٹ ملک میں فرقہ وارانہ ہم آہنگی پیدا کریں: مودی

نئی دہلی: وزیر اعظم نریندر مودی نے بھارتیہ جنتا پارٹی (بی جے پی) کے ارکان پارلیمنٹ سے ملک میں فرقہ وارانہ ہم آہنگی پیدا کرنے میں اہم کردار ادا کرنے کی منگل کو اپیل کرتے ہوئے کہا کہ ملک کے مفاد کے لئے یہ ناگزیر ہے۔

نریندر مودی نے یہاں پارلیمنٹ کی لائبریری بھون میں منعقد پارلیمانی پارٹی کی میٹنگ سے خطاب کرتے ہوئے یہ اعلان کیا۔ میٹنگ کے بعد پارلیمانی امور کے وزیر پرہلاد جوشی نے نامہ نگاروں کو بتایا کہ وزیر اعظم نے کہا کہ ’’ہم یہاں قومی مفادات کو پورا کرنے کے لئے آئے ہیں۔ ہمارے لئے ملک سب سے اوپر ہے اور ترقی ہمارا منتر ہے‘‘۔

وزیر اعظم مودی نے کہا کہ ترقی کے لیے امن، اتحاد اور ہم آہنگی کا ہونا ناگزیر ہے۔ انہوں نے اپوزیشن کو گھیرتے ہوئے کہا کہ کچھ سیاسی پارٹیوں کے لئے پارٹی مفاد ملک کے مفاد سے زیادہ اہم ہے۔ اس کا نتیجہ ہم نے دیکھا ہے۔ انہوں نے کہا کہ تمام ممبران پارلیمنٹ کو سماج میں امن وامان، بھائی چارہ اور ہم آہنگی کو یقینی بنانے کے لئے اہم کردار ادا کرنا چاہیے۔

دہلی فسادات سے غمزدہ دکھائی دے رہے نریندر مودی نے اپنی تقریر میں جذباتی ہو گئے۔ انہوں نے پوچھا کہ آزادی کے لئے جان دینے والوں نے ملک کے لئے کیا یہی سوچا تھا، آج ہم کہاں پہنچ گئے ہیں، حب الوطنی سے زیادہ پارٹی کو اہمیت کیوں دے رہے ہیں۔ میٹنگ میں وزیر دفاع راج ناتھ سنگھ، وزیر داخلہ امت شاہ، بی جے پی کے صدر جگت پرکاش نڈا، مرکزی وزیر نتن گڈکری اور تھاورچند گہلوت موجود تھے۔