سونی پت میں بی جے پی لیڈر کا قتل، زمین کے تنازع پر پڑوسی نے گولی مار دی

سونی پت: ہریانہ کے سونی پت میں بی جے پی لیڈر سریندر جواہرا کو زمین کے تنازع پر پڑوسی نے گولی مار کر قتل کر دیا۔ یہ واقعہ جمعہ کی رات تقریباً ساڑھے نو بجے پیش آیا جب سریندر جواہرا اپنی دکان پر بیٹھے ہوئے تھے۔ قاتل، جو ان کا پڑوسی تھا، وہاں پہنچا اور انہیں گولی مار دی، جس کے بعد موقع سے فرار ہو گیا۔ اس واقعے کی سی سی ٹی وی فوٹیج بھی سامنے آئی ہے۔

پولیس کے مطابق، بی جے پی لیڈر سریندر جواہرا نے اپنے پڑوسی کی بوا کی زمین خریدی تھی، جس کو لے کر دونوں کے درمیان تنازع چل رہا تھا۔ کچھ دن پہلے قاتل نے انہیں زمین پر قدم نہ رکھنے کی دھمکی بھی دی تھی۔ جمعہ کی رات جب سریندر جواہرا اپنی زمین پر بُوائی کے لیے گئے، تب بھی دونوں کے درمیان تلخ کلامی ہوئی تھی۔

ذرائع کے مطابق، قاتل اس تنازعے کی وجہ سے کافی دنوں سے غصے میں تھا اور موقع دیکھ کر اس نے سریندر جواہرا کو نشانہ بنایا۔ پولیس کو شبہ ہے کہ قتل کی وجہ پہلے سے جاری زمین کا جھگڑا ہی ہے۔

واقعے کے فوراً بعد پولیس موقع پر پہنچی اور مقتول کی لاش کو پوسٹ مارٹم کے لیے بھیج دیا۔ پولیس کا کہنا ہے کہ قاتل کی گرفتاری کے لیے چھاپے مارے جا رہے ہیں اور جلد ہی اسے گرفتار کر لیا جائے گا۔ اس کے علاوہ، سی سی ٹی وی فوٹیج کی مدد سے دیگر شواہد بھی اکٹھے کیے جا رہے ہیں تاکہ کیس کو جلد از جلد حل کیا جا سکے۔

بی جے پی لیڈر کے قتل کے بعد علاقے میں کشیدگی پھیل گئی ہے اور ان کے حامیوں میں شدید غم و غصہ پایا جا رہا ہے۔ مقامی لوگوں کا کہنا ہے کہ سریندر جواہرا ایک متحرک اور عوام کے لیے کام کرنے والے لیڈر تھے، ان کا قتل علاقے کے لیے ایک بڑا نقصان ہے۔

پولیس نے عوام سے اپیل کی ہے کہ وہ افواہوں پر یقین نہ کریں اور کسی بھی مشتبہ سرگرمی کی اطلاع فوراً دیں۔ تحقیقات جاری ہیں اور پولیس جلد ہی قاتل کو پکڑنے کی امید کر رہی ہے۔