کسان کے قتل کے الزام میں بی جے پی رہنما مہندر ناگر کو پارٹی سے نکالا

بی جے پی نے اپنے لیڈر مہندر ناگر کو مدھیہ پردیش کے گنا ضلع میں مبینہ طور پر ایک کسان کے قتل کے الزام میں پارٹی سے نکال دیا ہے۔ ناگر فی الحال مفرور ہے۔ اتوار کو بی جے پی لیڈر مہندر ناگر نے گنا ضلع کے فتح گڑھ تھانہ علاقے کے تحت گنیش پورہ گاؤں میں ایک کسان کا بے دردی سے قتل کر دیا۔ اطلاعات کے مطابق کسان رام سوروپ ڈھاکڑ اپنی بیوی کے ساتھ کھیتوں میں جا رہے تھے کہ مہندر ناگر اپنے ساتھیوں کے ساتھ وہاں پہنچے، انہیں گھیر لیا اور ان پر حملہ کر دیا۔خبر ہے کہ  رام سوروپ کو پہلے بے دردی سے مارا پیٹا گیا، اور پھر ملزم نے اپنی تھر گاڑی زخمی کسان پر چڑھا دی۔

شائع خبروں کے مطابق واقعے کے بعد جب کسان کی بیٹیاں اپنے والد کو بچانے کے لیے پہنچیں تو ملزمان اور اس کے ساتھیوں نے ان کے ساتھ بھی غیر انسانی سلوک کیا۔ انہیں مارا پیٹا گیا، ان کے کپڑے پھاڑ دیے گئے اور ملزمان نے دہشت پھیلانے کے لیے ہوائی فائرنگ بھی کی۔ زخمی کسان کو ایک گھنٹے تک علاج کے لیے لے جانے سے روکا گیا جس سے اس کی حالت مزید بگڑ گئی۔

ضلع اسپتال میں داخل کرائے جانے کے بعد رام سوروپ کی علاج کے دوران موت ہوگئی۔ گاؤں والوں نے بتایا کہ مہندر ناگر نے گاؤں میں دہشت پھیلا دی ہے۔ وہ کسانوں کو ڈراتا ہے اور ان کی زمینوں پر قبضہ کرتا ہے۔ مزاحمت کرنے والے کسانوں کو ڈرایا یا مارا پیٹا جاتا ہے۔ اب تک تقریباً 25 کسان اپنی زمین بیچ کر گاؤں چھوڑ چکے ہیں۔ پولیس نے ملزم مہندر ناگر اور اس کے خاندان کی تین خواتین سمیت 14 لوگوں کے خلاف قتل کا مقدمہ درج کیا ہے۔ تمام ملزمان فی الحال مفرور ہیں۔ واقعے کے بعد علاقے میں کشیدگی پھیل گئی ہے۔ (بشکریہ نیوز پورٹل ’آج تک‘)