کانپور انکاؤنٹر: پولس اسٹیشن میں بری روحوں کا بسیرا، چھٹکارا کے لیے ہوئی پوجا!

اتر پردیش کے کانپور ضلع کے ایک پولس اسٹیشن میں پولس اہلکاروں نے بڑھتے جرائم کے گراف کو دیکھتے ہوئے اور 'بری روحوں' کو دور بھگانے کے لیے ہَون (پوجا) کا اہتمام کیا۔ ہَون کا انعقاد 3 جولائی کو ہوئے بکرو واقعہ کو دیکھتے ہوئے منعقد کرایا گیا، جس میں آٹھ پولس اہلکار شہید ہو گئے تھے اور سات دیگر زخمی ہوئے تھے۔ یہ پوجا منگل کے روز ہوئی۔

قابل ذکر ہے کہ کانپور واقع بکرو میں ہوئے واقعہ کے بعد چوبے پور پولس اسٹیشن میں تعینات سبھی ملازمین کو ہٹا دیا گیا تھا۔ اسٹیشن کے پولس اہلکاروں نے کہا کہ ایک مقامی پجاری نے انھیں بری روحوں سے آزاد کرنے کے لیے پوری رسم کے ساتھ پوجا کرنے کی صلاح دی تھی۔

ایک پولس افسر کا کہنا ہے کہ "کئی پولس اہلکاروں نے ڈیوٹی کے دوران 'اچھا محسوس نہ ہونے' کی شکایت کی تھی۔ اس لیے ہم نے سوچا کہ ہَون سے ماحول بہتر ہو سکتا ہے۔ ہم نے بکرو قتل عام کے سبھی ملزمین کو گرفتار کر لیا ہے اور ہم ماضی کو اپنے پیچھے رکھنا چاہتے ہیں۔" بتایا جا رہا ہے کہ کچھ مقامی لوگوں کے ساتھ تقریباً سبھی ڈیوٹی اسٹاف نے اس ہَون میں حصہ لیا۔

پجاری نے منتر پڑھنے کے ساتھ ہی پولس عملہ کو بھروسہ دلایا کہ پولس اسٹیشن اب بری روحوں سے آزاد ہو گیا ہے۔ بتایا جاتا ہے کہ ہَون کے دوران کسی بھی پولس اہلکار نے کوئی شکایت لے کر تھانہ پہنچے لوگوں کی شکایت درج نہیں کی اور انھیں پوجا ختم ہونے تک انتظار کرنا پڑا۔

چوبے پور اسٹیشن کے انچارج ڈی چودھری نے میڈیا سے بات چیت کےد وران بتایا کہ "تھانہ کی پاکیزگی کے لیے ہَون کا انعقاد کیا گیا۔" واضح رہے کہ کانپور کے چوبے پور تھانہ علاقہ کے بکرو گاؤں میں سرکل افسر سمیت 8 پولس اہلکاروں کو گینگسٹر وکاس دوبے اور اس کے ساتھیوں نے مل کر مار ڈالا تھا۔ بعد میں وکاس دوبے 10 جولائی کو ایک انکاؤنٹر میں مارا گیا تھا۔ اس کے پانچ ساتھی بھی پولس انکاؤنٹر میں مارے گئے۔