بہار: پورنیہ کالج کے پاس ہاسٹل میں یکے بعد دیگرے پھٹے کئی گیس سلنڈر، لاکھوں کا سامان جل کر خاک

بہار واقع پورنیہ کالج کے قریب ایک پرائیویٹ ہاسٹل میں 11 فروری کو گیس سلنڈر لیک ہونے سے شدید آگ لگ گئی۔ اس دوران یکے بعد دیگرے کئی سلنڈر دھماکے ہوئے۔ آگ قریب کے کچھ گھروں تک بھی پہنچ گئی۔ طلبا نے اس آتشزدگی کی اطلاع فوراً فائر بریگیڈ ٹیم کو دی۔ تقریباً ایک گھنٹے بعد فائر بریگیڈ کی ٹیم موقع پر پہنچی، لیکن تب تک ہاسٹل میں رکھے لاکھوں روپے کے سامان جل کر راکھ ہو چکے تھے۔

کافی مشقت کے بعد فائر بریگیڈ اہلکاروں نے آگ پر قابو پایا۔ اس حادثے میں طلبا کے سرٹیفکیٹ سے لے کر کئی دیگر اہم کاغذات جل کر خاک ہو گئے۔ حادثے کے بعد طلبا کا رو رو کر برا حال ہے۔ بتایا جاتا ہے کہ منگل کی صبح منڈل لاج میں رہنے والے تقریباً 70-60 طلبا کھانا بنا رہے تھے۔ اسی دوران ایک گیس سلنڈر لیک ہو گیا اور اس میں آگ لگ گئی۔ اس آگ نے کمرے میں رکھے کپڑوں کو اپنی زد میں لے لیا، اور پھر اس نے خوفناک شکل اختیار کر لی۔

ایک ہفتہ سے بہہ رہی پچھوا ہوا نے آگ میں گھی ڈالنے کا کام کیا اور دیکھتے ہی دیکھتے 20-15 گھروں کو اپنی زد میں لے لیا۔ ہاسٹل مین طلبا کھانا بنانے کے لیے چھوٹے چھوٹے گیس سلنڈر کا استعمال کرتے ہیں، انہی سلنڈر میں دھماکہ ہوا۔ طلبا نے فائر بریگیڈ محکمہ کے تئیں ناراضگی بھی ظاہر کی ہے، کیونکہ انھوں نے پہنچنے میں تاخیر کی۔ جب تک وہ پہنچتے، تب تک سبھی طلبا خود آگ پر قابو پانے کی کوشش کرتے رہے۔

اس آتشزدگی واقعہ میں کسی ہلاکت کی خبر نہیں ہے، لیکن لاکھوں کے سامان ضرور آگ کی نذر ہو گئے۔ آگ لگنے کی وجہ سے علاقہ میں افرا تفری کا ماحول بھی پیدا ہو گیا تھا۔ طلبا نے بتایا کہ سلنڈر بم کی طرح پھٹ رہے تھے اور ان کی آواز دور تک سنائی دی۔ مقامی لوگوں کا کہنا ہے کہ ہاسٹل میں آگ بجھانے کا کوئی سامان بھی موجود نہیں تھا۔