بہار: بوچہاں ضمنی انتخاب میں آر جے ڈی کی شاندار جیت، تیجسوی نے کہا ’عوام مخالف پالیسیوں اور تکبر کو شکست‘

پٹنہ: بہار کے مظفرپور ضلع کی بوچہاں (محفوظ) سیٹ کے ضمنی انتخاب میں آر جے ڈی امیدوار امر پاسوان نے شاندار جیت درج کی ہے۔ انہوں نے این ڈی اے کی امیدوار بے بی کماری کو 36 ہزار سے زیادہ ووٹوں سے شکست دی۔ پارٹی کی جیت پر آر جے ڈی کے لیڈر تیجسوی یادو نے بوچہاں کے عوام کا شکریہ ادا کرتے ہوئے کہا کہ عوام مخالف پالیسیوں اور تکبر کی شکست ہوئی ہے۔

خیال رہے کہ بوچہاں سیٹ پر آر جے ڈی امیدوار امر پاسوان نے بی جے پی کے بے بی کمار کو 36658 ووٹوں سے شکست دی۔ آر جے ڈی امیدوار کو 82547 ووٹ حاصل ہوئے جبکہ بی جے پی کو 45889 ووٹ ہی مل سکے۔ وی آئی پی کی گیتا کماری 29276 ووٹوں کے ساتھ تیسرے مقام پر رہیں۔ امر پاسوان سابق رکن اسمبلی مسافر پاسوان کے بیٹے ہیں جن کے انتقال کے بعد یہ سیٹ خالی ہوئی تھی۔

بوچہاں میں جیت کے بعد تیجسوی نے اپنے ٹوئٹر ہینڈل سے ٹوئٹ کیا، ’’بوچہاں کے عوام کو دلی مبارک باد۔ ضمنی اسمبلی انتخاب میں بے روزگاری، مہنگائی اور تعلیم، صحت، زراعت اور قانون کے بدحال نظام سے پریشان حال عوام نے ڈبل انجن حکومت اور موقع پرست ٹھگ بندھن میں شامل 4 سیاسی جماعتوں کو عوام مخالف پالیسیوں اور ان کے تکبر کو ہرانے کا کام کیا ہے۔

قابل ذکر ہے کہ یہ سیٹ پہلے مکیش سہنی کی پارٹی وی آئی پی کے پاس تھی۔ اس انتخاب میں کل 13 امیدوار میدان میں تھے، جن میں سے 10 مرد اور تین خواتین ہیں۔ بوچہاں اسمبلی سیٹ پر 12 اپریل کو ووٹنگ کی گئی تھی۔