بہار اسمبلی انتخاب 2025: 17 ایسے اقدام اٹھائے گئے ہیں جو پہلے کبھی دیکھنے کو نہیں ملے

چیف الیکشن کمشنر گیانیش کمار نے آج پریس کانفرنس کے دوران کہا کہ بہار انتخاب میں 17 نئے اقدام اٹھائے گئے ہیں۔ اس بار بہت کچھ نیا ہوگا۔ مثلاً ہر بوتھ پر ویب کاسٹنگ ہوگی، ہر مرکز پر 1200 سے زیادہ ووٹر نہیں ہوں گے، پولنگ روم کے باہر موبائل سنٹر ہوگا، ای وی ایم میں امیدواروں کی رنگین تصویر ہوگی، سیریل نمبر بھی اب زیادہ واضھ ہوگا، ای سی آئی نیٹ پر انتخاب کی سبھی جانکاریاں ہوں گی، ای سی آئی نیٹ کے ذریعہ بی ایل او سے بات کر سکتے ہیں۔ چیف الیکشن کمشنر نے مزید بتایا کہ بہار انتخاب میں ووٹر کے لیے ہیلپ لائن نمبر 1950 جاری کیا گیا ہے۔ ساتھ ہی الیکشن سپروائزر باہری ریاستوں کے ہوں گے۔

الیکشن کمیشن نے آج بہار کی 243 اسمبلی سیٹوں پر ہونے والے انتخاب کی تاریخ کا اعلان کرنے کے ساتھ ساتھ 7 ریاستوں میں 8 اسمبلی سیٹوں پر ضمنی انتخاب کی تاریخ کا بھی اعلان کر دیا ہے۔ 7 ریاستوں کی 8 اسمبلی سیٹوں پر 11 نومبر 2025 کو ووٹ ڈالے جائیں گے اور ان سبھی کے نتائج 14 نومبر کو آئیں گے۔ یعنی ووٹ شماری 14 نومبر کو ہوگی۔ جن اسمبلی سیٹوں پر ضمنی انتخابات ہونے ہیں وہ راجستھان کی انٹا، جموں و کشمیر کی بڈگام و ناگروٹا، پنجاب کی ترن تارن، جھارکھنڈ کی گھاٹ شلا، تلنگانہ کی جبلی ہلز، میزورم کی ڈامپا اور اڈیشہ کی نواپاڑہ سیٹیں ہیں۔

الیکشن کمیشن نے بہار میں 2 مراحل میں انتخابات کرانے کا اعلان کیا ہے۔ پہلے مرحلہ کے لیے 6 نومبر کو اور دوسرے مرحلہ کے لیے 11 نومبر کو ووٹ ڈالے جائیں گے۔ چیف الیکشن کمشنر گیانیش کمار نے مطلع کیا کہ انتخابات کے نتائج 14 نومبر کو سامنے آئیں گے، اور 16 نومبر تک اسمبلی انتخاب سے متعلق سبھی کارروائیوں کو انجام دے دیا جائے گا۔ انھوں نے یہ بھی جانکاری دی کہ پہلے مرحلہ میں 121 اسمبلی سیٹوں پر اور دوسرے مرحلہ میں 122 اسمبلی سیٹوں پر ووٹنگ ہوگی۔

چیف الیکشن کمشنر گیانیش کمار نے پریس کانفرنس میں جانکاری دیتے ہوئے بتایا کہ بہار اسمبلی انتخاب میں سبھی پولنگ بوتھ پر ویب کاسٹنگ کا انتظام ہوگا۔ انھوں نے کہا کہ ووٹنگ کے عمل کو شفاف اور آسان بنانے کے لیے ہر ممکن کوشش کی گئی ہے۔ ووٹرس کی سہولت کو پیش نظر رکھتے ہوئے یہ یقینی بنایا جائے گا کہ ایک بوتھ پر 1200 سے زائد ووٹرس نہ ہوں۔ الیکشن کمیشن کے اعداد و شمار کے مطابق بہار میں مجموعی طور پر 90712 پولنگ مراکز بنائے گئے ہیں، جہاں اوسطاً فی مرکز 818 ووٹرس رجسٹرڈ ہیں۔ ان میں سے 76801 پولنگ مراکز دیہی علاقوں میں ہیں، جبکہ 13911 شہری علاقوں میں واقع ہیں۔ الیکشن کمشنر نے یہ بھی جانکاری دی کہ 1350 ماڈل پولنگ مراکز قائم کیے گئے ہیں تاکہ ووٹرس کو بہتر سہولیات مل سکیں۔

بہار میں اسمبلی کی 243 سیٹوں کے لیے ہونے والے انتخاب کی تاریخوں کا اعلان جلد ہی ہونے والا ہے۔ الیکشن کمیشن کی پریس کانفرنس جاری ہے اور چیف الیکشن کمشنر گیانیش کمار انتخاب سے متعلق تیاریوں کی جانکاریاں دے رہے ہیں۔ اس دوران انھوں نے بتایا کہ اس مرتبہ پہلی بار ووٹ دینے والے ووٹرس کی تعداد تقریباً 14 لاکھ ہے۔

الیکشن کمیشن آج صرف بہار اسمبلی انتخاب کے لیے تاریخوں کا ہی اعلان نہیں کرے گا، بلکہ 7 ریاستوں کی 8 اسمبلی سیٹوں پر ضمنی انتخابات کا بھی اعلان ہوگا۔ جن سیٹوں پر ضمنی انتخابات ہوں گے، ان میں راجستھان کی انٹا، جموں و کشمیر کی بڈگام و ناگروٹا، پنجاب کی ترن تارن، جھارکھنڈ کی گھاٹ شلا، تلنگانہ کی جبلی ہلز، میزورم کی ڈامپا اور اڈیشہ کی نواپاڑہ سیٹیں شامل ہیں۔

بہار اسمبلی انتخاب کو لے کر سرگرمیاں اپنے عروج پر پہنچ گئی ہیں۔ این ڈی اے اور انڈیا بلاک کی پارٹیاں ووٹرس کو اپنی طرف متوجہ کرنے کے لیے خوب انتخابی وعدے کر رہی ہیں، لیکن اس مرتبہ اصل ایشو بے روزگاری اور ہجرت رہنے والا ہے۔ الیکشن کمیشن کے افسران نے گزشتہ دنوں بہار کا دورہ کر اسمبلی انتخاب کی تیاریوں کا جائزہ بھی لے لیا ہے اور آج 4 بجے پریس کانفرنس ہے جس میں انتخاب کے لیے تاریخوں کا اعلان کیا جائے گا۔ اس کے ساتھ ہی ماڈل کوڈ آف کنڈکٹ بھی نافذ ہو جائے گا۔