عوام کے سامنے سچ ظاہر، بی جے پی کی 'بی ٹیم' ہے بی ایس پی: اکھلیش یادو

سماجوادی پارٹی کے قومی صدر اکھلیش یادو نے ہفتہ کے روز بی جے پی اور بی ایس پی (بہوجن سماج پارٹی) پر زوردار حملہ کیا۔ اکھلیش یادو نے کہا کہ ہم نے عوام کے سامنے بی جے پی اور بی ایس پی کا سچ ظاہر کر دیا ہے، ہم ان کی سچائی عوام کے سامنے لانے میں کامیاب ہوئے ہیں۔ اکھلیش یادو نے لکھنؤ میں ہفتہ کو آچاریہ نریندر دیو کی جینتی پر عقیدت کے پھول چڑھانے کے بعد اپنے ان خیالات کا اظہار کیا۔ انھوں نے کہا کہ "ہم نے آزاد امیدوار کو حمایت دے کر بڑا معاملہ عوام کے سامنے کھول دیا۔" اکھلیش یادو نے مزید کہا کہ "ہم عوام کے سامنے بی جے پی اور بی ایس پی کا سچ ظاہر کرنے میں کامیاب رہے ہیں۔ اب تو ثابت ہو گیا ہے کہ بی ایس پی ہی بی جے پی کی 'بی ٹیم' ہے۔"

سماجوادی پارٹی سربراہ نے کہا کہ جو لوگ بی جے پی کے ساتھ اندر ہی اندر ملے ہوئے ہیں، ان کا پردہ فاش ہونا ضروری تھا۔ اس لیے سماجوادی پارٹی نے آزاد امیدوار کی حمایت کی۔ ہمارا مقصد تھا کہ ووٹ پڑے اور عوام جانے کہ کون کس سے ملا ہے۔

اکھلیش یادو نے بی جے پی کو تنقید کا نشانہ بناتے ہوئے کہا کہ صرف اقتدار میں بنے رہنے کے لیے یہ کہیں پر بھی کسی کے ساتھ اتحاد کر سکتی ہے۔ ہم نے تو یہاں آزاد امیدوار کی حمایت کی، لیکن بعد میں اس کا پرچہ ہی خارج ہو گیا۔

اکھلیش یادو نے کہا کہ آج کے دن ہم سردار پٹیل جی کو آچاریہ نریندر دیو جی اور والمیکی جی کو یاد کر رہے ہیں۔ لوگوں کا روزگار ختم ہو گیا ہے، ملازمت چلی گئی ہے اور کسان ایم ایس پی کے لیے پریشان ہے۔ ہم عزم کر رہے ہیں کہ ملک کا جو ڈیولپمنٹ چھوٹا ہے، اس کو آگے بڑھائیں گے اور ترقی کو رفتار دیں گے۔