کانپور میں ہوٹل کا کھانا کھاکر آسٹریلوی کھلاڑی بیمار، پیٹ میں تکلیف کے بعد پہنچے اسپتال

 کانپور شہر کے گرین پارک اسٹیڈیم میں انڈیا اے اور آسٹریلیا اے کے درمیان ون ڈے میچ کے دوران آسٹریلیائی ٹیم کے کپتان سمیت 4 کھلاڑی مبینہ طور پر ہوٹل کا کھانا کھانے کے بعد بیمار ہو گئے۔ سبھی کے پیٹ میں تکلیف ہوئی۔ جن میں تیز گیند باز ہینری تھارنٹن بھی شامل ہیں جنہیں تشویشناک حالت میں ریجینسی اسپتال میں بھرتی کرایا گیا جب کہ دیگر تینوں کو طبی معائنے کے بعد چھٹی دی دے گئی۔ حالانکہ اسپتال یا آسٹریلوی ٹیم انتظامیہ کی جانب سے باضابطہ طور پر اس کی تصدیق نہیں کی گئی ہے۔

آسٹریلیائی ٹیم منیجر کے مطابق چار کھلاڑیوں کو جانچ کے لیے اسپتال بھیجا گیا تھا۔ رپورٹ معمول پر آنے کے بعد تینوں کو چھٹی دے دی گئی  لیکن ہینری تھارنٹن میں سنگین انفیکشن کی علامات پائی گئی ہے جس کی وجہ سے انہیں اسپتال میں داخل ہونا پڑا۔ ان کی حالت بہتر ہونے پرانہیں بھی واپس ہوٹل بھیج دیا گیا۔ اس واقعے کے بعد ٹیم انتظامیہ نے کھلاڑیوں کی حفاظت کو یقینی بنانے کے لیے ان کے کھانے کی فہرست میں تبدیلیاں کی ہیں۔ اس سے ٹیم کی آئندہ تیاریوں پر اثر پڑا ہے تاہم انتظامیہ کا کہنا ہے کہ کھلاڑیوں کی صحت اولین ترجیح ہے۔

خبر کے مطابق بیمار ہونے والے کھلاڑی مبینہ طور پر پہلے ون ڈے میں ٹیم کا حصہ تھے۔ ذرائع کے مطابق آسٹریلیا اے کی میڈیکل ٹیم صورتحال پر گہری نظر رکھے ہوئے ہے اور کھلاڑیوں کو مقامی کھانے اور پانی سے محتاط رہنے کا مشورہ دیا گیا ہے۔ ریجینسی اسپتال کے ڈاکٹروں نے بتایا کہ تھارنٹن کی حالت بہتر ہو رہی ہے، لیکن فی الحال ان کی فیلڈ میں واپسی کے لیے ٹائم لائن غیر یقینی ہے۔ ہوٹل انتظامیہ نے اس معاملے پر تبصرہ کرنے سے انکار کر دیا ہے۔

متعلقہ محکمہ خوراک کا کہنا ہے کہ انہوں نے ہوٹل کے کھانے کے نمونے لیے ہیں لیکن کچھ بھی قابل اعتراض یا نامناسب نہیں ملا۔ ہوٹل کے منیجر کا کہنا ہے کہ آسٹریلوی کھلاڑیوں کی بیماری کھانے کی وجہ سے نہیں تھی۔ ہو سکتا ہے کہ وہ موسم کی تبدیلی سے متاثر ہوئے ہوں۔ اس سلسلے میں بی سی سی آئی کے نائب صدر راجیو شکلا کا کہنا ہے کہ لینڈ مارک ہوٹل کانپور کے بہترین ہوٹلوں میں سے ایک ہے۔ اگر کھانا ایسا ہوتا تو تمام کھلاڑیوں کو پریشانی ہوتی۔