آتشی نے دہلی کی وزیر اعلیٰ ریکھا گپتا کو خط لکھا، خواتین کو 2500 روپے دینے کا مطالبہ

نئی دہلی: عام آدمی پارٹی (عآپ) کی سینئر رہنما آتشی نے دہلی کی وزیر اعلیٰ ریکھا گپتا کو خط لکھ کر مطالبہ کیا ہے کہ وہ ’مہیلا سمرِدھی یوجنا‘ کے تحت خواتین کو 2500 روپے کی پہلی قسط فوری طور پر جاری کریں۔

آتشی نے اپنے خط میں وزیر اعظم نریندر مودی کے اس وعدے کی یاد دہانی کرائی جو انہوں نے 31 جنوری کو دہلی کے دوارکا میں منعقدہ ایک ریلی میں کیا تھا۔ اس وقت وزیر اعظم نے کہا تھا کہ دہلی میں بی جے پی حکومت بنتے ہی پہلی کابینہ میٹنگ میں اس اسکیم کو منظور کیا جائے گا اور خواتین کے بینک کھاتوں میں 8 مارچ سے رقم جمع ہونی شروع ہو جائے گی۔

عام آدمی پارٹی کی رہنما نے دہلی حکومت کو یاد دلایا کہ وزیر اعظم نے خواتین سے کہا تھا کہ وہ اپنے بینک اکاؤنٹ کو موبائل نمبر سے جوڑ لیں تاکہ انہیں رقم ملنے کی اطلاع فوری طور پر موصول ہو سکے۔ انہوں نے خط میں لکھا کہ اب جبکہ 8 مارچ قریب ہے، دہلی کی خواتین بے صبری سے اس وعدے کے پورا ہونے کا انتظار کر رہی ہیں۔

آتشی نے وزیر اعلیٰ ریکھا گپتا سے اپیل کی کہ وہ فوری طور پر اس معاملے پر کارروائی کریں اور خواتین کو ان کا حق دلانے کے لیے ان کے بینک کھاتوں میں رقم منتقل کریں۔ انہوں نے کہا کہ دہلی کی خواتین حکومت کی طرف دیکھ رہی ہیں اور ان کی امیدیں ٹوٹنی نہیں چاہئیں۔

عام آدمی پارٹی مسلسل اس معاملے پر احتجاج کر رہی ہے اور مختلف علاقوں میں مظاہرے کر رہی ہے۔ آتشی نے کہا کہ بی جے پی حکومت کو اپنے وعدے کے مطابق خواتین کے کھاتوں میں رقم بھیجنی چاہیے، تاکہ وہ اعتماد کے ساتھ اپنے روزمرہ کے اخراجات پورے کر سکیں۔

یہ معاملہ دہلی میں سیاسی گرمی بڑھا رہا ہے اور بی جے پی حکومت پر دباؤ بڑھ رہا ہے کہ وہ اپنی اعلان کردہ اسکیم کو نافذ کرے۔ آیا 8 مارچ کو خواتین کے کھاتوں میں یہ رقم جمع ہوتی ہے یا نہیں، یہ ایک بڑا سوال بنا ہوا ہے۔