اشوک گہلوت نے جواہر لال نہرو کو ان کی برسی کے موقع پر پیش کیا خراج عقیدت

جے پور: راجستھان کے وزیر اعلی اشوک گہلوت نے آج ہندوستان کے پہلے وزیر اعظم پنڈت جواہر لال نہرو کی 57 ویں برسی کے موقع پر انہیں خراج عقیدت پیش کیا۔ اشوک گہلوت نے کہا کہ آزاد ہندوستان کے تعمیر نو کے معمار، عالمی سطح کے بہترین اداروں کے خالق، جدید ہندوستان کے تخلیق کار، ملک کے پہلے وزیر اعظم اور بھارت رتن یافتہ پنڈت جواہر لال نہرو کی برسی پر پرخلوص سلام۔

انہوں نے کہا کہ آزاد ہندوستان کے سامنے متعدد چیلنجز تھے۔ ملک کو تعلیم، سیکورٹی، روزگار، انفراسٹرکچر، زراعت، صنعت، معاشرتی ترقی یعنی تمام شعبوں میں تحفظ چاہیے تھا۔ پنڈت نہرو نے ملک کے تمام مسائل کو ایک بہترین شکل میں تبدیل کر دیا اور آج جو ہندوستان ہم دیکھ رہے ہیں اس کی بنیاد بھی رکھی۔

انہوں نے کہا کہ راجستھان کو اس بات پر بھی فخر ہے کہ پنڈت نہرو نے 2 اکتوبر 1959 کو ہندوستان میں پنچائتی راج کی تشکیل راجستھان کے ناگور ضلع میں کی تھی۔ ہم ان کی برسی کے موقع پر ہنودستان کی تعمیر میں شراکت داری نبھانے کے عزم کا اعادہ کرتے ہیں۔ اسمبلی اسپیکر ڈاکٹر سی پی جوشی نے بھی پنڈت نہرو کو ان کی برسی کے موقع پر خراج تحسین اور سلام پیش کیا۔

سابق نائب وزیر اعلی سچن پائلٹ نے پنڈت نہرو کو خراج تحسین پیش کرتے ہوئے کہا کہ آزادی کی لڑائی میں اہم کردار نبھانے کے ساتھ ساتھ ہندوستان کی تعمیر نو میں پنڈت نہرو نے جو تعاون دیا ہے اس کے لئے قوم ہمیشہ ان کی مقروض رہے گی۔ اسی طرح ریاستی کانگریس صدر اور وزیر تعلیم گووند سنگھ ڈوٹاسرا، وزیر زراعت لال چند کٹاریہ اور وزیر ٹرانسپورٹ پرتاپ سنگھ کھاچریا واس اور دیگر کئی کانگریس رہنماؤں نے پنڈت نہرو کو خراج پیش کیا۔