پاکستان کے لیے جاسوسی میں گرفتار تمام لوگ بی جے پی اور بجرنگ دل سے ہیں وابسہ! دگوجے

بھنڈ: کانگریس کے سینئر لیڈر اور مدھیہ پردیش کے سابق وزیر اعلی دگ وجے سنگھ نے الزام لگاتے ہوئے کہا ہے کہ پڑوسی ملک پاکستان کے لئے جاسوسی کرنے کے معاملہ میں پكڑے گئے لوگ بجرنگ دل اور بھارتیہ جنتا پارٹی (بی جے پی) سے وابستہ ہیں۔

دگوجے سنگھ نے ریاست کے ضلع بھنڈ ہیڈکوارٹر پر کل دیر شام صحافیوں سے بات چیت کی۔ وہ یہاں مہارانا پرتاپ کے مجسمہ کی نقاب کشائی کرنے آئے تھے۔ مدھیہ پردیش میں حال ہی میں جاسوسی کرنے کے سلسلہ میں کچھ لوگوں کی گرفتاری کے تناظر میں انہوں نے کہا کہ پاکستان کے لئے جتنے لوگ بھی جاسوسی کرتے پائے گئے، وہ سب کے سب بجرنگ دل، بھارتیہ جنتا پارٹی سے جڑے ہوئے لوگ ہیں، جو ’آئی ایس آئی‘ سے پیسہ لے رہے ہیں۔

سینئر کانگریس لیڈر نے کہا آئی ایس آئی کے لئے جاسوسی مسلمان کم، غیرمسلم زیادہ کررہے ہیں .... انہوں نے کہا کہ ہماری نظریات کی لڑائی بی جے پی سے ہے۔ راشٹریہ سوئم سیوک سنگھ سے ہے، جنہوں نے ہندوستان کی آزادی کی لڑائی میں حصہ نہیں لیا۔ ہمیں وہ راشٹریتا(قومیت) کا سبق سکھانا چاہتے ہیں۔ کہاں تھے، یہ لوگ 1947 سے پہلے۔ کہاں تھے یہ لوگ، جب آزادی کی لڑائی میں بھگت سنگھ، اشفاق اللہ خان نے پھانسی کا پھندہ چوما۔

سنگھ نے اقتصادی ایشو پر مرکز کی نریندر مودی حکومت کی پالیسیوں کی بھی تنقید کی اور کہا کہ ملک میں لاکھوں لوگ بے روزگار ہو چکے ہیں۔ مختلف صنعتی شعبوں میں مندی چھا گئی ہے۔ انہوں نے کہا کہ ان سب کے لئے مرکزی حکومت کی پالیسیاں ذمہ دار ہیں، جو اقتصادی علاقے کے لئے ٹھیک نہیں ہیں۔

انہوں نے ریاستی کانگریس صدر کے عہدے کو لے کر چل رہی مبینہ رسہ کشی پر کہا کہ وزیر اعلی کمل ناتھ اب بھی ریاستی کانگریس کے صدر ہیں۔ ریاستی کانگریس صدر کا عہدہ خالی نہیں ہے۔ یہ عہدہ جب خالی ہوگا، تب نئے صدر کے بارے میں مرکزی قیادت غور کرے گی۔ انہوں نے اسی سے متعلق ایک سوال کے جواب میں کہا کہ سینئر لیڈر جیوتی رادتیہ سندھیا کانگریس سے ناراض نہیں ہیں اور ان کی خود سندھیا سے بات ہوئی ہے۔