’’یومِ جمہوریہ پر مودی حکومت زرعی قوانین واپس لینے کا کرے اعلان‘‘

فرخ آباد: سماج وادی پارٹی (ایس پی) سربراہ اکھلیش یادو نے کہا ہے کہ بھارتیہ جنتا پارٹی (بی جے پی) کی قیادت والی حکومت کو یوم جمہوریہ کے مبارک موقع پر سراپا احتجاج کسانوں کے مطالبے کو قبول کرتے ہوئے تینوں زرعی قوانین واپس لینا چاہئے اور ایسا قانون بنانا چاہئے جس سے کسانوں کی فصل کی قیمت دو گنی مل سکے۔

شہر میں مسینی چوراہا واقع ایک گیسٹ ہاوس میں قنوج-فرخ آباد سماج وادی کارکنوں کے تین روزہ تربیتی کیمپ سے خطاب کرنے کے بعد اکھلیش یادو نے میڈیا نمائندوں سے کہا کہ ’’بی جے پی نعرے، سلوگن، اشتہار، جھوٹ اورنفرت کی سیاست کررہی ہے جو ملک کے ہر شہری کے لئے چیلنجنگ ہے۔‘‘

اتر پردیش کے سابق وزیر اعلیٰ اکھلیش یادو نے کہا کہ بی جے پی حکومت جب سے اقتدار میں آئی ہے جھوٹ،نفرت اور خوف کی سیاست بڑھ گئی ہے۔ نتیجتاً سماجوادی پارٹی نے ریاست کے 23 اضلاع کی اسمبلی حلقوں میں 'کسان شیوروں' کے انعقاد کا آغاز کیا ہے تاکہ کارکنان بیدار ہوسکیں۔ انہوں نے دعوی کیا کہ آئین کو بچانے کی کوشش کرنا اور صحت مند سیاست کرنا ایس پی کی سب سے بڑی پالیسی اور بڑی پارٹی ہونے کی وجہ ہے۔

فرخ آباد میں چھپائی کاروبار کے متاثرہ کنبوں کا سوال اٹھاتے ہوئے سابق وزیر اعلی نے کہا کہ آنے والے انتخاب میں سماجوادی پارٹی کے اقتدار میں آنے پر یہاں کے چھپائی صنعت سے وابستہ کنبوں کو کسی بھی قسم کی کوئی پریشانی نہیں ہوگی۔ اگر حکومت کو ٹریمنٹ پلانٹ لگانے کی ضرورت پڑے گی تو چھپائی صنعت کو فروغ دینے کے لئے یہ بھی لگایا جائے گا۔

بی جے پی حکومت کے تمام نعروں کو کھوکھلا قرار دیتے ہوئے سابق وزیر اعلی اکھلیش یادو نے کہا کہ اترپردیش کی عوام تبدیلی چاہتی ہے ایسے میں بی جے پی حکومت ریاست سے جانا طے ہے اور ایس پی کی حکومت بنے گی۔تبھی ترقی کے راستے کھل سکیں گے۔ ایک دیگر سوال کے جواب میں انہوں نے کہا کہ آئندہ اسمبلی انتخابات میں ان کی پارٹی چھوٹی چھوٹی پارٹیوں سے اتحاد کرسکتی ہے۔انہوں نے کہا کہ آنے والے وقت میں اترپردیش میں سماجوادی پارٹی کی حکومت بنے گی تو اعظم خان پر لگے جھوٹے مقدمات واپس لئے جائیں گے۔ انہوں نے سوال کیا کہ آخر وزیر اعلی اور نائب وزیر اعلی دونوں کے خلاف درج مقدموں کوواپس لیا گیا تو ایسے میں وزیر اعلی سے عوام کیا توقع رکھیں۔