اجیت پوار کی اہلیہ سنیترا پوارنے آر ایس ایس کے خواتین ونگ کے پروگرام میں شرکت کی

راشٹریہ سویم سیوک سنگھ کی خواتین ونگ 'راشٹرا سیویکا سمیتی' کے ایک پروگرام میں مہاراشٹرا کے نائب وزیر اعلیٰ اجیت پوار کی اہلیہ  رکن پارلیمنٹ  سنیترا پوار کی شرکت نے سیاسی حلقوں میں بحث چھیڑ دی ہے۔ اس کا اہتمام کنگنا رناوت کی رہائش گاہ پر کیا گیا تھا۔ انہوں نے سوشل میڈیا پر ایک تصویر شیئر کی ہے۔ ان تصویروں میں سنگھ کے پروگرام میں سنیترا پوار کے آنے پر کئی لوگوں نے سوال اٹھائے ہیں۔

اجیت پوار ناگپور کے ریشم باغ جانے سے گریز کر تے رہے ہیں۔ تاہم اب ان کی اہلیہ اور ایم پی سنیترا پوار راشٹریہ سیویکا سمیتی کے اجلاس میں شرکت کرکے موضوع بحث بن گئی ہیں۔ 20 اگست کو، کنگنا رناوت نے X پر پوسٹ کیا، "آج 'راشٹر سیویکا سمیتی' خواتین کے ونگ کا میری رہائش گاہ پر اہتمام کیا گیا تھا۔ ہم مل کر سناتن اقدار، ہندو ثقافت اور قومی شعور کو مزید مضبوط بنائیں گے۔ ہم سب نے انسانی خدمت، قوم کی تعمیر اور تحفظ کے لیے کام جاری رکھنے کا عزم کیا ہے۔‘

نیشنلسٹ کانگریس پارٹی (شرد پوار) کے رہنما اور رکن اسمبلی  روہت پوار نے آر ایس ایس کے پروگرام میں سنیترا پوار کی شرکت پر اجیت پوار کی پارٹی پر تنقید کی ہے۔ روہت پوار نے اسے دو رخی سیاست قرار دیتے ہوئے کہا کہ ایک طرف اجیت پوار شیوا، ساہو، پھولے، امبیڈکر اور یشونت راؤ چوان کا نام لیتے رہتے ہیں، دوسری طرف ان کے نمائندے آر ایس ایس کی میٹنگوں میں جاتے ہیں۔ روہت پوار نے یہ خدشہ بھی ظاہر کیا کہ اجیت پوار پر کسی قسم کا دباؤ ہو سکتا ہے۔

جب نامہ نگاروں نے نائب وزیر اعلیٰ اجیت پوار سے ان کی اہلیہ سنیترا پوار کے وردھا ضلع کے دورے کے دوران آر ایس ایس کے ایک پروگرام میں شرکت کے بارے میں پوچھا تو نائب وزیر اعلیٰ نے طنزیہ انداز میں جواب دیا، "میں پوچھتا ہوں، مجھے نہیں معلوم۔ مجھے منٹ منٹ نہیں معلوم کہ میری بیوی صبح سے شام تک کہاں جاتی ہے۔ آپ نے پوچھا ہے۔ اب میں پوچھتا ہوں، کیوں، کہاں گئی؟"

سنیترا پوار نے ایکس پر پوسٹ کرتے ہوئے اپنی وضاحت دی، "ایک میٹنگ میں میری موجودگی کے بارے میں ایک بحث چل رہی ہے، جس کے  تعلق سے میں یہ واضح کرنا چاہوں گی کہ اس کے پیچھے کوئی سیاسی مقصد نہیں تھا، دیگر خواتین ارکان پارلیمنٹ بھی اس میں موجود تھیں۔ راجیہ سبھا کی رکن ہونے اور بارامتی میں طویل عرصے سے سماجی کام کرنے کی وجہ سے، میں یہ جاننے کے لیے بے چین ہوں کہ مختلف تنظیموں کے خواتین ونگ کیا کیا کرتے ہیں اس لئے ان  کے کاموں کو سمجھنے کے لیے وہاں گئی تھی۔ اس وقت جب مجھ سے بات کرنے کو کہا گیا تو میں نے صرف دو الفاظ میں اپنی بات رکھی۔ میری موجودگی کا کوئی سیاسی مطلب نہیں تھا بس میرا مقصد خواتین کی حوصلہ افزائی تھا اور رہے گا ۔‘‘