اجے کمار للو نے نشاد برادری کے لوگوں کو پیش کیا 10 لاکھ روپے کا چیک

لکھنؤ۔ پریاگ راج: اتر پردیش کانگریس کے صدر اجے کمار للو گزشتہ روز بسوار گاؤں پہنچ کر کانگریس کی جنرل سکریٹری پریانکا گاندھی واڈرا کے ذریعہ بھیجے گئے 10 لاکھ روپے کی مالی مدد کا چیک نشاد برادری کے لوگوں کے حوالے کیا اور اعلان کیا کہ نشاد برادری کو ان کے حقوق دلانے کے لئے، پارٹی یکم مارچ سے ندی حق یاترا کا آغاز کرے گی۔ اس موقع پر سابق ایم ایل اے انوگرہ نارائن سنگھ کے ساتھ، متعدد ریاستی عہدیدار، پریاگ راج کے ضلع صدر، کئی سینئر رہنما بھی موجود تھے۔

پارٹی کے ترجمان اوما شنکر پانڈے نے بتایا کہ گزشتہ دنوں بسوار، پریاگراج میں، پولیس انتظامیہ نے نشاد برادری کی کشتیاں توڑ دیں تھیں، ان کے گھروں میں داخل ہوکر خواتین اور بچوں کے ساتھ مار پیٹ کی گئی تھی۔ نشاد برادری کے ساتھ ہونے والی ہراسانی اور مظالم پر کانگریس کی جنرل سکریٹری پرینکا گاندھی کی قیادت میں ریاستی کانگریس کے صدر اجے کمار للو سمیت تمام قائدین 21 فروری کو بسوار پہنچے اور پولیس ہراسانی کا نشانہ بننے والے نشاد برادری کے لوگوں کی بات سنی اور انہیں یقین دلایا کہ وہ اور پوری کانگریس پارٹی نشاد برادری کے حقوق کے لئے ان کے ساتھ کھڑی ہے۔

پرینکا گاندھی واڈرا نے نشاد برادری سے کہا تھا کہ نشاد برادری کا ندیوں سے گہرا تعلق ہے، لیکن بی جے پی حکومت میں کان کنی مافیاؤں اور حکومت کے مابین گٹھ جوڑ کے سبب نشاد برادری کے لوگوں پر ظلم ہو رہے ہیں۔ جن وسائل پر پہلا حق نشاد برادری کا ہے اس حق سے انہیں محروم کیا جا رہا ہے۔