احمد آباد طیارہ حادثہ: سابق وزیر اعلیٰ وجئے روپانی کی لاش کی ہوئی پہچان، اب تک 32 کے ڈی این اے سیمپل میچ

احمد آباد طیارہ حادثے میں جان گنوانے والے گجرات کے سابق وزیر اعلیٰ وجئے روپانی کا ڈی این اے میچ ہو گیا ہے۔ اب ان کی لاش کو ان کے اہل خانہ کو سونپنے کا کام شروع کر دیا گیا ہے جس کے بعد راجکوٹ میں ان کی آخری رسوم ادا کی جائے گی۔

محکمہ صحت سے جڑے ایک افسر نے آج بتایا کہ ڈی این اے ٹیسٹنگ کے ذریعہ طیارہ حادثہ میں مارے گئے لوگوں میں سے 32 کی پہچان کر لی گئی ہے وہیں 12 کنبوں نے اب تک لاشوں کے لیے دعویٰ کیا ہے۔ اس حادثے میں اموات کی تعداد 275 تک پہنچ چکی ہے جن میں سے 20 لاشوں کو ان کے اہل خانہ کے سپرد کیا جا چکا ہے۔ ان کے ڈیٹھ سرٹیفکیٹ بھی دستیاب کرا دیئے گئے ہیں۔

ایمبولنس کے ذریعہ سیکوریٹی کے ساتھ لاشوں کو ان کے آبائی شہر پہنچایا جا رہا ہے۔ اس کے لیے 230 ٹیمیں بنائی گئی ہیں جو مہلوکین کے رشتہ داروں سے سیدھے رابطے میں ہیں۔ 192 ایمبولنس اور گاڑی اسٹینڈ بائے پر ہیں۔ حکومت نے اس بات کا اعلان کیا ہے کہ سبھی جسد خاکی کو اہل خانہ کے گھر تک پہنچانے کے لیے کسی بھی طرح کا کوئی چارج نہیں لیا جائے گا۔ حادثے میں جان گنوانے والے غیر ملکی شہریوں میں سے 11 کے اہل خانہ آج احمد آباد پہنچ سکتے ہیں۔

فوری اطلاع کے لیے احمد آباد سول اسپتال کی طرف ہر دو گھنٹے پر میڈیکل بلیٹن جاری کرنے کا اعلان کیا گیا ہے۔ اس کے لیے احمد آباد سول اسپتال میں 590 ڈاکٹرس کی پیرا میڈیکل اسٹاف کی ٹیم بنائی گئی ہے۔ ٹیم 24x7 موڈ میں کام کر رہی ہے۔ دعویٰ کیا جا رہا ہے کہ جیسے جیسے ڈی این اے میچ ہوتا جا رہا ہے ویسے ویسے کاغذی کارروائی پوری کرتے ہوئے جسد خاکی کو ان کے رشتہ داروں کے سپرد کر دیا جا رہا ہے۔