ویڈیو کال کے ذریعہ رکن اسمبلی سے رقم وصول کرنے کی کوشش، ملزم گرفتار

چھترپور: مدھیہ پردیش کی چھترپور پولیس نے ویڈیو کال کے ذریعہ سائبر ایکسٹورشن (تاون طلب کرنا) کر کے ایم ایل اے نیرج دیکشت سے رقم کا مطالبہ کرنے والے بین ریاستی سرغنہ کو راجستھان سے گرفتارکرلیا ہے۔

پولیس ذرائع نے بتایا کہ 22 مئی کو ضلع چھترپور کے مہاراج پور کے رکن اسمبلی نیرج دیکشت نے ایک موبائل نمبر ہولڈر نامعلوم خاتون کے ذریعہ فحش ویڈیو بناکر بلیک میل کرنے کے تعلق سے گڑھی ملہرا تھانہ میں شکایت درج کرائی تھی۔ اس کے بعد سائبر سے ملی معلومات کی بنیاد پر گڑھی ملہرا پولیس اور سائبرسیل کی مشترکہ ٹیم ملزم کی تلاش کے لئے راجستھان کے ضلع بھرت پور روانہ کی گئی۔ جہاں اس ٹیم نے ناگر تحصیل کے سیکری تھانہ علاقہ کے نکچا کاواس کے رہائشی عادل (19) کو گرفتار کر کے اس سے پوچھ گچھ کی، جس میں ملزم نے اپنا جرم قبول کرلیا۔

پولیس پوچھ گچھ میں ملزم نے بتایا کہ وہ اب تک 21 لوگوں کو سائبر ایکسٹورشن کرکے 14 لاکھ 22 ہزار روپے وصول کرچکا ہے۔ اس کے پاس سے ضبط ہوئے تین موبائیلوں میں فحش ویڈیو سمیت فریادی کو بلیک میل کرنے کے لئے ریکارڈ ویڈیو کال ملے ہیں۔ ملزم نے بتایا کہ وہ فیس بک سے لوگوں کی معلومات جمع کرتا تھا۔ اور لوگوں کو واٹس ایپ سے ویڈیو کال کرکے اپنے پاس رکھے ریکارڈڈ ایڈلٹ ویڈیو کے ذریعہ اسکرین ریکارڈر کی مدد سے ویڈیو ریکارڈ کرتا تھا۔

اس کے بعد پھر وہ ویڈیو وائرل کرنے کی دھمکی دے کر لوگوں سے پیسے وصول کرتا تھا۔ اس مجرمانہ کام کے لئے وہ اڈیشہ کی فرضی سم کا استعمال کرتا تھا۔ اس نے اترپردیش، پنجاب، گجرات، مدھیہ پردیش، مہاراشٹر، ہریانہ اور کرناٹک کے تقریباً 21 لوگوں کو سائبر ایکسٹورشن کرکے روپے وصول کیے ہیں۔