ابھیشیک بنرجی کو سپریم کورٹ سے بڑی راحت، آنکھوں کے علاج کے لیے بیرون ملک جانے کی ملی مشروط اجازت

ترنمول کانگریس (ٹی ایم سی) رکن پارلیمنٹ ابھیشیک بنرجی کو سپریم کورٹ سے پیر (10 اگست) کو بڑی راحت ملی ہے۔ عدالت نے آنکھوں کے علاج کے لیے ابھیشیک بنرجی کو بیرون ملک جانے کی مشروط اجازت دے دی ہے۔ سپریم کورٹ نے ابھیشیک بنرجی کو رواں سال ستمبر میں 3 ہفتہ بیرون ملک جا کر علاج کرانے کی اجازت دی ہے۔

سپریم کورٹ نے واضح کیا کہ ابھیشیک بنرجی کو بیرون ملک جانے سے قبل اپنے سفر کا مکمل شیڈول، فلائٹ کی مکمل تفصیلات، ٹھہرنے کی جگہ اور علاج کرانے والے اسپتال یا ڈاکٹر کی معلومات فراہم کرنی ہوں گی۔ عدالت نے یہ بھی کہا کہ ہر شہری کو بیرون ملک سفر اور اپنی پسند کا علاج کرانے کا حق ہے۔ ابھیشیک بنرجی کی جانب سے عدالت میں دلیل دی گئی کہ وہ جانچ میں شامل ہو چکے ہیں اور بیرون ملک سفر کے دوران بھی ضروری شرائط پر عمل کرنے کے لیے تیار ہیں۔ عدالت نے ان حالات کو مدنظر رکھتے ہوئے ستمبر میں 3 ہفتوں کے بیرون ملک سفر کی اجازت دے دی۔

واضح رہے کہ کلکتہ ہائی کورٹ نے حال ہی میں ابھیشیک بنرجی کو بیرون ملک جا کر علاج کرانے کی اجازت دینے سے انکار کر دیا تھا اور کہا تھا کہ کولکاتہ کے سرکاری ایس ایس کے ایم اسپتال کے ماہرین سے مشورہ لیں۔ ہائی کورٹ نے کہا تھا کہ ابھیشیک بنرجی کے علاج کے متبادل پر غور کرتے وقت اس بات کو بھی مدنظر رکھنا ہوگا کہ ان پر کئی مجرمانہ مقدمات چل رہے ہیں، جن کی تحقیقات ابھی جاری ہے۔

ابھیشیک بنرجی میڈیکل بورڈ کے سامنے جانے کے لیے راضی نہیں تھے۔ اس کے بعد کلکتہ ہائی کورٹ نے ان کی عرضی خارج کر دی تھی۔ ہائی کورٹ نے کہا تھا کہ درخواست گزار کے وکیل کی دلیل کو دیکھتے ہوئے کہ وہ (ابھیشیک بنرجی) عدالت کی ہدایت کے مطابق میڈیکل بورڈ کے سامنے پیش نہیں ہوں گے۔ عدالت کا ماننا تھا کہ عرضی دائر کر کے اٹھائے گئے مسائل کو مزید وقت تک زیر التوا نہیں رکھنا چاہیے۔ اس لیے موجودہ عرضی خارج کی جاتی ہے۔