دہرادون کے تیونی جنگلات میں لگی بھیانک آگ، سیب کے باغات جل کر راکھ

دہرادون کے ایک دور افتادہ پہاڑی علاقے تیونی کے جنگل میں بھیانک آگ لگ گئی۔ اس آگ نے ہرٹاڑ گاؤں کے قریب بڑے پیمانے پرتباہی مچا ئی ہے۔ جنگل میں لگی یہ آگ دیکھتے ہی دیکھتے رہائشی اور زرعی علاقوں میں پھیل گئی جس کے سیب سینکڑوں درخت جل کر راکھ ہوگئے وہیں ایک دو منزلہ مکان بھی آگ کی زد میں آگیا جو پوری طرح تباہ ہوگیا ہے۔

مقامی لوگوں کے مطابق آگ اتنی بھیانک اور تیز تھی کہ پورے گاؤں میں کہرام مچ گیا۔ گاؤں والے ادھر ادھر بھاگتے رہے، پانی کی بالٹیوں سے آگ بجھانے کی کوشش کی لیکن تیز ہواؤں اور دشوار گزار پہاڑی علاقے میں آگ پر قابو پانا مشکل ہوگیا۔ سخت مشقت کے بعد جب آگ پر قابو پایا گیا لیکن تب تک آگ نے جنگل کے سینکڑوں درختوں کے ساتھ ساتھ کسانوں کی برسوں کی محنت کو راکھ میں ملادیا تھا۔

بتایا جا رہا ہے کہ سیب کے مقامی کسان اس آگ سے سب سے زیادہ متاثر ہوئے ہیں۔ ان کے باغات، جن سے اس موسم میں اچھی فصل اور منافع کی توقع تھی، اب مکمل طور پر راکھ ہو چکے ہیں۔ واقعہ کے بعد سے گاؤں کے لوگ خوف و ہراس اور افراتفری میں مبتلا ہیں۔ آگ اتنی بھیانک تھی کہ لوگ اپنی جان بچانے اور اپنے باغات کی حفاظت کے لیے ادھر ادھر بھاگتے نظر آئے۔

اس واقعے کی خوفناک تصاویر سوشل میڈیا پر تیزی سے وائرل ہو رہی ہیں۔ ان تصاویر میں واضح طور پر بھڑکتے ہوئے شعلے، سیب کے قیمتی درختوں کو جلتے اور دھوئیں سے بھرا ہوا پورا علاقہ دیکھا جاسکتا ہے۔ بھاری مالی نقصان کا شکار متاثرہ کسان اب حکومت اور انتظامیہ سے التجا کر رہے ہیں کہ ان کے نقصانات کا فوری اور مناسب معاوضہ دیا جائے تاکہ وہ دوبارہ کھڑے ہوسکیں۔ بتا دیں کہ اتراکھنڈ میں پچھلے کچھ سالوں میں جنگلات میں آگ لگنے کے واقعات میں اضافہ ہوا ہے جس کا مقامی معیشت پر گہرا اثر پڑ رہا ہے۔