اتر پردیش کے باغپت واقع جمنا ندی میں گیس پائپ لائن اچانک پھٹنے سے 35 فیٹ اوپر اٹھ گیا پانی، افرا تفری کا ماحول

اتر پردیش کے باغپت ضلع میں ہفتہ کے روز ایک بڑا حادثہ ہوتے ہوتے ٹل گیا۔ بتایا جا رہا ہے کہ جمنا ندی کے پاس سے گزر رہی گیس پائپ لائن اچانک زوردار آواز کے ساتھ پھٹ گئی۔ عینی شاہدین کا کہنا ہے کہ دھماکہ اس قدر تیز تھا کہ ندی کا پانی تقریباً 30 سے 35 فیٹ اوپر تک اٹھنے لگا۔ دھماکے کی آواز سن کر لوگ ندی کی طرف دوڑے تو دیکھا کہ وہاں فوارے اٹھ رہے ہیں۔ یہ نظارہ دیکھ کر آس پاس کے گاؤں میں افرا تفری کا ماحول پیدا ہو گیا۔

واقعہ باغپت کے کاٹھا اور مویکلا گاؤں کے پاس پیش آیا ہے۔ بتایا جا رہا ہے کہ انڈین آئل کارپوریشن (آئی او سی) کی یہ گیس پائپ لائن دادری، نوئیڈا سے ہوتے ہوئے ہریانہ کے پانی پت تک بچھی ہوئی ہے۔ ابتدائی طور پر اندیشہ ظاہر کیا جا رہا ہے کہ پائپ لائن کسی بھاری پتھر یا تیز دباؤ کی وجہ سے پھٹی ہوگی۔ حادثہ کی جانکاری ملتے ہی مقامی لوگ بڑی تعداد میں وہاں جمع ہو گئے اور کچھ دیر تک حالات کشیدہ بنا رہا۔

گیس پائپ لائن پھٹنے کی خبر سن کر پولیس اور انتظامیہ کے اعلیٰ افسران بھی کثیر پولیس فورس کے ساتھ موقع پر پہنچ گئے۔ انھوں نے ایمبولنس کا انتظام بھی کیا تاکہ کسی بھی ایمرجنسی حالت میں فوراً راحت دی جا سکے۔ موقع پر پہنچی پولیس نے لوگوں کو الرٹ کیا اور فوراً کمپنی کے اعلیٰ افسران کو جانکاری دی۔ اس کے بعد پائپ لائن کو بند کرنے کا عمل شروع ہو گیا۔

راحت کی بات یہ رہی کہ وقت رہتے گیس کی سپلائی بند ہو گئی۔ اس سے کسی بڑے حادثہ یا ہلاکت کا اندیشہ ختم ہو گیا۔ فی الحال ماہرین کی ٹیم پائپ لائن کی مرمت اور تکنیکی جانچ میں مصروف ہے۔ ایس ڈی ایم سبھاش سنگھ نے بتایا کہ صبح پانی پت-دادری پائپ لائن اچانک پھٹ گئی۔ انھوں نے اس حادثہ میں کسی طرح کے نقصان سے انکار کیا ہے۔