اتراکھنڈ: بدری ناتھ ہائی وے پر بھربھرا کر گرا پہاڑ، بی جے پی رہنما انل بلونی نے بھاگ کر بچائی جان...دیکھیں ویڈیو

اتراکھنڈ کے پہاڑی علاقوں میں ان دنوں لگاتار بارش ہو رہی ہے جس کی وجہ سے عام زندگی پوری طرح مفلوج ہوکر رہ گئی ہے۔ شدید بارش سے جگہ جگہ لینڈ سلائڈ کے واقعات ہوئے ہیں۔ ملبہ گرنے سے سڑکوں سے رابطہ منقطع ہوتا جا رہا ہے، جس سے عام لوگوں کے ساتھ ساتھ عوامی نمائندگان کو بھی مشکلوں کا سامنا کرنا پڑ رہا ہے۔ کچھ اسی طرح کے خطرے کا سامنا گڑھوال سے ایم پی انل بلونی کو بھی کرنا پڑا۔

دراصل بی جے پی رہنما انل بلونی اور ایم ایل اے ونود کنڈاری آفت زدہ علاقوں کا جائزہ لینے کے لیے دیو پریاگ جا رہے تھے۔ جیسے ہی بلونی کا قافلہ دیو پریاگ کے قریب پہنچا، بدری ناتھ ہائی وے پر اچانک اوپر سے پوری پہاڑی کا حصہ بھربھرا کر سڑک پر آ گرا۔ بلونی اور کنڈاری اس کے بعد فوراً پیچھے بھاگے۔ دیکھتے ہی دیکھتے بھاری مقدار میں ملبہ اور بولڈر سڑک پر پھیل گیا جس کی وجہ سے اس راستے پر آمد و رفت پوری طرح متاثر ہو گئی۔ اس کے بعد ان دونوں عوامی نمائندگان کو پیدل ہی آگے ملبے کو کراس کرنا پڑا۔ رکن پارلیمنٹ نے سوشل میڈیا پر اس واقعہ کا ویڈیو بھی پوسٹ کیا ہے۔

عینی شاہدین کے مطابق پورا منظر کچھ ہی سیکنڈ میں ہو گیا۔ جس راستے رہنماؤں کا قافلہ گزر رہا تھا، اسی پر اچانک پہاڑی کھسکنے لگی۔ دیکھتے ہی دیکھتے سڑک ملبے سے پٹ گئی۔ غنیمت رہی کہ کسی بھی گاڑی یا شخص کو کوئی نقصان نہیں ہوا، ورنہ بڑی انہونی ہو سکتی تھی۔

اس واقعہ نے ایک مرتبہ پھر پہاڑوں میں مانسون کے دوران لوگوں کے عدم تحفظ اور مشکلات کو ظاہر کر دیا ہے۔ دیو پریاگ علاقے میں گزشتہ کئی دنوں سے مسلسل ہو رہی بارش سے پہاڑیاں کمزور ہو چکی ہیں جس کے سبب ہر وقت لینڈ سلائڈ کا خطرہ بنا ہوا ہے۔

محکمہ موسمیات نے 18 ستمبر کو ریاست سبھی اضلاع میں کچھ مقامات پر ہلکی سے درمیانی بارش ہونے کی پیشن گوئی کی ہے۔ ان ضلعوں میں پوڑی، نینی تال، دہرہ دون، باگیشور، پتھورا گڑھ، چمپاوت میں بارش کا الرٹ ہے۔ 19 ستمبر اور 20 ستمبر کو بھی بارش کا یہی پیٹرن رہنے کا امکان ہے۔