بحیرہ عرب سے 1800 کروڑ روپے قیمت کے 300 کلو ڈرگس ضبط، گجرات اے ٹی ایس اور کوسٹ گارڈ کو ملی بڑی کامیابی

غیر قانونی ڈرگس اسمگلنگ کے خلاف گجرات اے ٹی ایس اور ہندوستانی کوسٹ گارڈ کو بہت بڑی کامیابی ملی ہے۔ دونوں نے مشترکہ آپریشن میں 300 کلو گرام ڈرگس برآمد کیے ہیں، جس کی قیمت 1800 کروڑ روپے تک بتائی جا رہی ہے۔ اسمگلر یہ ڈرگس بحیرہ عرب کے راستے ہندوستان لا رہے تھے۔ حالانکہ گجرات اے ٹی ایس اور کوسٹ گارڈ سے سامنا ہوتے ہی اسمگلروں نے ڈرگس کو سمندر میں پھینک دیا اور موقع سے فرار ہو گئے۔

یہ واقعہ 13-12 اپریل کی رات کا ہے۔ ہندوستانی کوسٹ گارڈ نے خود اس کی تصویر ساجھا کرتے ہوئے اس آپریشن کی اطلاع دی ہے۔ اس تصویر میں برآمد کیے گئے ڈرگس کی کھیپ بھی دیکھی جا سکتی ہے۔

میڈیا رپورٹس کے مطابق یہ ڈرگس میتھام فیٹامن ہو سکتی ہے۔ گجرات اے ٹی ایس اس کی جانچ کر رہی ہے۔ دراصل گجرات اے ٹی ایس کو بین الاقوامی سمندری سرحدی خط (آئی ایم بی ایل) کے پاس ڈرگس اسمگلر کی خفیہ اطلاع ملی تھی۔ اے ٹی ایس نے فوراً اس کی اطلاع ہندوستانی کوسٹ گارڈ کو دی۔ دونوں نے مشترکہ آپریشن کے تحت آئی ایم بی ایل کے پاس گشت لگانی شروع کی۔ اس دوران انہیں ایک مشتبہ کشتی ملی۔

کوسٹ گارڈ کا جہاز دیکھ کر اسمگلر ڈرگس کی پوری کھیپ سمندر میں پھینک کر بھاگ کھڑے ہوئے۔ کوسٹ گارڈ نے سمندر میں ایک چھوٹی کشتی اتار کر پھینکے گئے ڈرگس کو اوپر نکال لیا۔ ساتھ ہی خاص جہاز سے انہوں نے ڈرگس اسمگلروں کا پیچھا شروع کر دیا۔ لیکن کچھ ہی دیر میں اسمگلر آئی ایم بی ایل پار کر گئے، جہاں سے انہیں گرفتار نہیں کیا جا سکتا۔ ایسے میں کوسٹ گارڈ کو واپس ہونا پڑا۔