حیدرآباد کی آر سی بی پر یکطرفہ جیت

مارکو یانسن (25 رن پر 3وکٹ) اور ٹی نٹراجن (10 پر 3) کی خطرناک گیندبازی کی مدد سے سن رائزرس حیدرآباد نے رائل چیلنجرز بنگلور کو 16.1 اوور میں صرف 68 رن پرسمیٹنے کے بعد آٹھ اووروں میں ایک وکٹ پر 72 رن بناکر یکطرفہ جیت حاصل کی۔

حیدرآباد کی یہ لگاتار پانچویں جیت ہے اور وہ پوائنٹس ٹیبل میں دوسرے نمبر پر آگئی ہے۔ دوسری جانب بنگلورو کو آٹھ میچوں میں تیسری شکست کا سامنا کرنا پڑا۔

حیدرآباد نے ٹاس جیت کر پہلے گیند بازی کرنے کا درست فیصلہ کیا۔ میچ کے دوسرے اوور میں مارکو یانسن نے تین شکار کرتے ہوئے آر سی بی کی اننگ کو اتناپیچھے دھکیل دیا کہ وہ کبھی واپس ہی نہ آسکی۔ پچ میں تیز گیند بازی کے لئے مددتھی لیکن یہ کسی بھی طریقے سے 68 پرآل آوٹ ہونے والی پچ نہیں ہے۔ سن رائزرز کے تمام گیند بازوں نے عمدہ بولنگ کی اور وکٹوں کی بہتی گنگا میں سب نے ہاتھ دھویا۔

یانسن نے کپتان فاف ڈو پلیسس، وراٹ کوہلی اور انوج راوت کودوسرے ہی اوور میں پویلین بھیج دیا۔ وراٹ کا کھاتہ نہیں کھلا۔ نٹراجن نے گلین میکسویل، ہرشل پٹیل اور ونیندو ہسرنگا کا شکار کیا۔ جگدیش سوچتھ نے 12 رن پردو وکٹ لئے جبکہ بھونیشور کمار اور عمران ملک کوایک ایک وکٹ ملا۔ بنگلورو کے 68 میں سویاش پربھودیسائی نے 15 اور میکسویل نے 12 رنز بنائے۔ بنگلور کی اننگ میں تیسرا سب سے زیادہ اسکور اضافی 12 رنوں کارہا۔

حیدرآباد نے آٹھ اوورمیں ایک وکٹ کے نقصان 72 رن بناکر 72 گیند باقی رہتے یکطرفہ جیت حاصل کی۔ یہ آئی پی ایل میں کسی بھی ٹیم کے لئے گیندوں کے معاملے میں چوتھی سب سے بڑی جیت ہے۔ حیدرآباد کی ٹیم سات میں سے لگاتار پانچ میچ جیت کر دوسرے نمبر پر پہنچ گئی ہے، جب کہ آرسی بی کے بھی حیدرآباد کی ہی طرح 10 پوائنٹس ہیں، لیکن اس کے آٹھ میچوں میں 10 پوائنٹس ہیں اوروہ اب پوائنٹس ٹیبل میں چوتھے نمبر پر ہے۔

ابھیشیک شرما 28 گیندوں میں آٹھ چوکوں اور ایک چھکا کی مدد سے 47 رن بنا کر آؤٹ ہوئے۔ کپتان کین ولیمسن 16 اور راہل ترپاٹھی سات رنز بنا کر ناٹ آؤٹ رہے۔ راہل ترپاٹھی نے ہرشل پٹیل پرلیگ سائیڈ میں چھکا لگا کر میچ ختم کیا۔