’بچوں کی تعلیم اور گھر والوں پر منفی اثر پڑ رہا‘، ایچ-1 بی ویزا میں تاخیر اور منسوخی پر ہندوستان کا اظہارِ فکر

بیرون ممالک میں مقیم ہندوستانی شہریوں سے جڑے معاملوں پر حکومت ہند نے ایک بار پھر واضح کیا ہے کہ وہ ان کے مفادات کی حفاظت کے لیے پُرعزم ہیں۔ ویزا مسائل، سیکورٹی سے جڑے معاملوں، بھگوڑے جرائم پیشوں کی واپسی اور بیرون ممالک میں ہندوستانی طلبا کی موت جیسے ایشوز پر وزارت خارجہ نے اپنا نظریہ آج واضح کیا۔

وزارت خارجہ کے ترجمان رندھیر جیسوال نے کہا کہ حکومت کو ایچ-1 بی ویزا کے بار بار نو تقرر ہونے سے متعلق کئی شکایتیں ملی ہیں۔ اس وجہ سے بڑی تعداد میں ہندوستانی شہری طویل مدت سے بیرون ممالک میں پھنسے ہیں، جس سے ان کے گھر والوں اور بچوں کی تعلیم پر منفی اثرات پڑ رہے ہیں۔ انھوں نے بتایا کہ ویزا سے جڑے ایشوز کسی بھی ملک کی خود مختاری کے دائرۂ اختیار میں آتے ہیں۔ ہندوستان نے اپنی فکر امریکہ کے سامنے نئی دہلی اور واشنگٹن ڈی سی دونوں جگہ اٹھائی ہے۔ امریکہ کے ساتھ لگاتار بات چیت کی جا رہی ہے تاکہ ہندوستانی شہریوں کو ہو رہی دقتوں کو کم کیا جا سکے۔

ہندوستان نے امریکہ میں کام کرنے والے ہزاروں ہندوستانی پیشہ وروں سے جڑے ایچ-1 بی ویزا معاملے پر سنگین فکر ظاہر کی۔ وزارت خارجہ نے کہا کہ بڑی تعداد میں ہندوستانی درخواست کنندگان کے پہلے سے طے ایچ-1 بی ویزا انٹرویو اچانک رد یا آگے کھسکا دیےگ ئے ہیں، جس سے لوگوں کو شدید پریشانیوں کا سامنا کرنا پڑ رہا ہے۔ وزارت خارجہ کے ترجمان نے ہفتہ واری پریس بریفنگ میں یہ باتیں سامنے رکھیں۔ انھوں نے کہا کہ حکومت کو کئی ہندوستانی شہریوں سے شکایتیں ملی ہیں۔ ان شکایتوں میں کہا گیا ہے کہ ویزا انٹرویو از سر نو مقرر کیے جانے سے وہ طویل مدت تک ہندوستان میں پھنسے ہوئے ہیں اور امریکہ لوٹ کر اپنی ملازمت جوائن نہیں کر پا رہے ہیں۔

وزارت کے مطابق دسمبر کے وسط میں جن ایچ-1 بی ویزا درخواست کنندگان کے انٹرویو طے تھے، انھیں اچانک کئی مہینوں کے لیے ملتوی کر دیا گیا۔ کچھ درخواست کنندگان کو ای میل کے ذریعہ بتایا گیا کہ ان کے انٹرویو اب اگلے سال مئی تک کے لیے بڑھا دیے گئے ہیں۔ بتایا جا رہا ہے کہ یہ فیصلہ سوشل میڈیا پروفائل اور آن لائن سرگرمیوں کی اضافی جانچ کے سبب لیا گیا ہے۔ اس تاخیر سے ہندوستانی شہریوں اور ان کے اہل خانہ کو معاشی، خاندانی و تعلیمی سطح پر سنگین پریشانیوں کا سامنا کرنا پڑ رہا ہے۔