ممبئی نے لگاتار آٹھ شکست کے بعدآخر کار پہلی فتح حاصل کی

پانچ بار کی چیمپئن ممبئی انڈینس نے لگاتار آٹھ شکست کے بعد آخر کارراجستھان رائلس کو پانچ وکٹوں سے شکست دے کر آئی پی ایل میں اپنی پہلی جیت کا مزہ چکھ لیا۔

راجستھان نے جوس بٹلر کی 67 رنز کی طوفانی اننگز کے بدولت 20 اوورز میں چھ وکٹ پر 158 رنز بنائے جبکہ ممبئی کی ٹیم نے سوریہ کمار یادو 51، تلک ورما 35، ایشان کشن 29 اور ٹیم ڈیوڈ کی ناٹ آؤٹ اننگز کی بدولت 19.2 اوور میں پانچ وکٹوں پر 161 رنز بنا کر فتح حاصل کی۔ اس جیت کے ساتھ ہی ممبئی کو آئی پی ایل ٹورنامنٹ میں پہلی بار دو پوائنٹس ملے اور ٹیم نے اپنے کپتان روہت شرما کو آج ان کی سالگرہ پر جیت کا تحفہ دیا۔

راجستھان نے درمیانی اووروں میں زیادہ وکٹ نہیں گنوائے لیکن وہ اپنی اننگز کو ٹھیک سے ختم نہیں کر پائے۔ بٹلر نے عمدہ اننگز کھیلی۔ ان کے علاوہ آخر میں اشون نے بھی اچھی بلے بازی کی۔ پچ پر گیند شاید بلے پر تھوڑی آہستہ آ رہی تھی۔ بٹلر نے 16ویں اوور میں ریتک شوکین کی گیند پر لگاتار چار چھکے لگائے لیکن اسی اوور کی آخری گیند پر کیچ آؤٹ ہو گئے۔ بٹلر نے 52 گیندوں پر 67 رنز میں پانچ چوکے اور چار چھکے لگائے۔

دیودت پڈیکل نے 15 اور کپتان سنجو سیمسن نے بھی 16 رنز بنائے۔ ڈیرل مچیل نے 20 گیندوں پر 17 رنز بنائے۔ نچلے آرڈر میں روی چندرن اشون نے نو گیندوں میں تین چوکوں اور ایک چھکے کی مدد سے 21 رنز بنائے۔ شمرون ہیٹمائر نے 14 گیندیں کھیلیں لیکن وہ صرف چھ رن (ناٹ آؤٹ)ہی بنا سکے۔