آئی پی ایل 2023: گجرات کو 154 رن بنانے میں چھوٹ گئے پسینے، آخری اوور میں پنجاب کو 6 وکٹ سے ہرایا

گزشتہ کچھ دنوں سے آئی پی ایل میں دھڑکنیں تیز کر دینے والے مقابلے دیکھنے کو مل رہے ہیں، اور آج بھی کچھ ایسا ہی نظارہ سامنے تھا جب گجرات نے بیسویں اوور کی پانچویں گیند پر پنجاب کو 6 وکٹ سے شکست دی۔ پنجاب نے گجرات کے سامنے جیت کے لیے محض 154 رنوں کا ہدف دیا تھا، لیکن اس کو حاصل کرنے میں ہی گجرات کے پسینے چھوٹ گئے۔ جب تک گجرات کے سلامی بلے باز شبھمن گل میدان میں تھے، کبھی بھی گجرات جیت سے دور دکھائی نہیں دے رہا تھا، لیکن آخری اوور میں جب جیت کے لیے 7 رن بنانے تھے اور پہلی ہی گیند پر سیم کرن نے گل کو بولڈ کر دیا تو سبھی کی سانسیں اٹک گئیں۔ اگلی تین گیندوں پر تین ہی رن بن سکے اور جب 2 گیندوں پر 4 رن کی ضرورت تھی تو راہل تیوتیا نے چوکا لگا کر گجرات کے خیمہ میں خوشی کا ماحول پیدا کر دیا۔

آج گجرات کے کپتان ہاردک پانڈیا نے ٹاس جیت کر پہلے گیندبازی کا فیصلہ کیا تھا۔ گجرات کے تیز گیندباز محمد سمیع نے اس فیصلے کو درست ٹھہراتے ہوئے اننگ کے پہلے اوور کی دوسری ہی گیند پر پربھ سمرن سنگھ کو پویلین بھیج دیا۔ ٹورنامنٹ میں زبردست فارم میں دکھائی دے رہے پنجاب کے کپتان شکھر دھون آج ناکام ہو گئے جب جوش لٹل نے انھیں 8 رن کے انفرادی اسکور پر جوزف کے ہاتھوں کیچ آؤٹ کرا دیا۔ اس کے بعد آنے والے بلے بازوں میں سے کسی نے بھی بڑا اسکور نہیں بنایا اور بیشتر نے دھیمی بلے بازی بھی کی۔

پنجاب کی طرف سے سب سے زیادہ 36 رن میتھیو شارٹ نے بنائے اور اس کے لیے انھوں نے 24 گیندوں کا سامنا کیا۔ بھانوکا راج پکشے نے 26 گیندوں میں 20 رن، جیتیش شرما نے 23 گیندوں میں 25 رن اور سیم کرن نے 22 گیندوں میں 22 رن کا تعاون کیا۔ شاہ رخ خان کی تعریف کرنی ہوگی جنھوں نے آخر میں محض 9 گیندوں پر 22 رن بنا کر ٹیم کا اسکور 150 کے پار پہنچانے میں اہم کردار ادا کیا۔ ہرپریت برار 5 گیندوں میں 8 رن اور رشی دھون 1 گیند پر 1 رن بنا کر ناٹ آؤٹ رہے۔ 20 اوور میں پنجاب کسی طرح 8 وکٹ کے نقصان پر 153 رن بنانے میں کامیاب ہوئی۔ گجرات کی طرف سے گیندبازی میں قابل تعریف مظاہرہ موہت شرما نے کیا جنھوں نے 4 اوور میں محض 18 رن دے کر 2 وکٹ لیے۔ باقی سبھی گیندبازوں (محمد سمیع، جوش لٹل، الزاری جوزف اور راشد خان) کے حصے میں 1-1 وکٹ آئے۔

جب گجرات کی ٹیم بلے بازی کرنے اتری تو شروع سے ہی مضبوط پوزیشن میں دکھائی دی۔ سلامی بلے باز ردھیمان ساہا جب 19 گیندوں پر 30 رن بنا کر آؤٹ ہوئے تو اس وقت گجرات کا اسکور 4.4 اوور میں 48 رن تھا، یعنی ٹیم تیزی کے ساتھ جیت کی طرف بڑھ رہی تھی۔ پھر سائی سدرشن نے سلامی بلے باز شبھمن گل کے ساتھ اچھی شراکت داری کی اور جب ٹیم کا اسکور 89 رن تھا تو وہ 19 رن کے انفرادی اسکور پر آؤٹ ہو گئے۔ شبھمن گل نے 49 گیندوں پر 67 رن بنائے جو گجرات کی جیت میں انتہائی اہم ثابت ہوئے۔

کپتان ہاردک پانڈیا 11 گیندوں میں محض 8 رن اور ڈیوڈ ملر نے 18 گیندوں میں ناٹ آؤٹ 17 رن بنائے۔ تیوتیا 2 گیندوں میں 5 رن بنا کر ناٹ آؤٹ میدان سے لوٹے، اور تیوتیا نے ہی چوکا لگا کر ٹیم کو جیت دلائی۔ گجرات نے جیت کے لیے ضروری 154 رنوں کا ہدف 19.5 اوور میں 4 وکٹ کے نقصان پر حاصل کیا۔ یعنی سانسیں روک دینے والے مقابلے میں گجرات نے پنجاب پر 6 وکٹ سے جیت حاصل کی۔ پنجاب کی طرف سے عرشدیپ سنگھ، کگیسو رباڈا، ہرپریت برار اور سیم کرن نے 1-1 وکٹ لیے۔