آئی پی ایل 2020: سنجے مانجریکر لیگ میچوں میں سپر اوور کرائے جانے کے خلاف

نئی دہلی: آئی پی ایل کے تیرہویں سیزن میں اب تک 4 میچ ٹائی ہوئے جس کے بعد سپر اوور میں کھیل چلا گیا۔ دو میچ تو 18 اکتوبر (اتوار) کو ہی ٹائی ہوئے جن کا فیصلہ سپر اوور کے ذریعہ سامنے آیا اور دلچسپ بات یہ ہے کہ ممبئی انڈینز بمقابلہ کنگز الیون پنجاب میچ میں تو سپر اوور بھی ٹائی ہو گیا تھا جس کی وجہ سے دوبارہ سپر اوور کھیلا گیا جس میں پنجاب کو جیت ہاتھ لگی۔ کرکٹ کی تاریخ میں پہلی بار ایسا ہوا کہ ایک سپر اوور ٹائی رہنے کے بعد دوسرا سپر اوور کرایا گیا۔ اس درمیان ہندستانی ٹیم کے سابق کھلاڑی اور کمنٹیٹر سنجے منجریکر کا خیال ہے کہ آئی پی ایل کے لیگ میچوں میں سپر اوور کی ضرورت نہیں ہے۔

منجریکر کا خیال ہے کہ آئی پی ایل لیگ میچوں میں سپر اوورز کی ضرورت نہیں ہے اور یہ پلے آف میچوں میں ہونا چاہئے۔ منجریکر نے اس تعلق سے ایک ٹوئٹ کیا ہے جس میں لکھا ہے کہ جب لیگ راؤنڈ بہت بڑا ہوتا ہے تو سپر اوور کی ضرورت نہیں ہوتی ہے۔ میرا خیال سے ضرورت پڑنے پر سپر اوورز کو پلے آف میں رکھنا چاہئے۔ قابل ذکر ہے کہ 18 اکتوبر کو ہی پہلے میچ میں کولکاتا نائٹ رائیڈرس بمقابلہ سنرائزرس حیدرآباد میچ ٹائی ہو گیا تھا جس کا فیصلہ سپر اوور کے ذریعہ ہوا تھا۔ یہ میچ کولکاتا نے سپر اوور میں بہ آسانی جیت لیا تھا۔