آئی پی ایل 2020: کے کے آر کا تاریخ رقم کرنے والا تیز گیندباز علی خان ٹورنامنٹ سے باہر

ابو ظہبی: انڈین پریمیر لیگ کے 13 ویں سیزن میں اب تک 20 میچ کھیلے جا چکے ہیں اور جوں جوں ٹورنامنٹ پیش قدمی کر رہا ہے کھلاڑیوں کی انجری کا سلسلہ بھی بڑھتا جا رہا ہے۔ بھونیشور کمار اور امت مشرا کے بعد کولکاتا نائٹ رائیڈرز کے فاسٹ بولر علی خان بھی آئی پی ایل 13 سے باہر ہو گئے ہیں۔ علی خان پہلے امریکی کھلاڑی ہیں جو آئی پی ایل کا حصہ بنے ہیں، حالانکہ انھیں ابھی تک ڈیبیو کرنے کا موقع نہیں ملا۔

دلچسپ بات یہ ہے کہ علی خان کو بطور متبادل آئی پی ایل میں تاریخ رقم کرنے کا موقع ملا۔ علی خان کو کے کے آر کے کھلاڑی ہیری کی انجری کے سبب ٹورنامنٹ میں شامل کیا تھا۔ لیکن علی خان اپنے ڈیبیو کرنے سے پہلے زخمی ہو جانے کی وجہ سے آئی پی ایل 13 سے باہر ہوگئے ہیں۔

کولکاتا نائٹ رائیڈرز نے ایک بیان جاری کرتے ہوئے کہا، "علی خان آئی پی ایل میں منتخب ہونے والے پہلے امریکی کھلاڑی بنے تھے لیکن انجری کی وجہ سے وہ اس ٹورنامنٹ میں نہیں کھیل پائیں گے۔‘‘ خیال رہے کہ علی خان کو پریکٹس کے دوران چوٹ لگ گئی ہے۔

علی خان نے کیریبین پریمیر لیگ میں اپنی شاندار کارکردگی سے سب کی توجہ اپنی طرف مبذول کرائی تھی۔ علی اس سال ٹریگوگو نائٹ رائیڈرز کا حصہ تھے، جس نے سی پی ایل ٹائٹل جیتا تھا۔ علی خان نے 8 میچوں میں 7.43 کے عمدہ اکنامی ریٹ کے ساتھ 8 وکٹیں حاصل کیں تھیں۔

کولکاتا نائٹ رائیڈرز کی آئی پی ایل 13 میں ابھی تک کی کارکردگی مل جلی رہی ہے۔ ٹیم پوائنٹس ٹیبل میں دو جیت اور دو شکست کے ساتھ دوسرے نمبر پر ہے اور بدھ کے روز اس کا مقابلہ چنئی سپر کنگز سے ہونے جا رہا ہے۔