ٹیسلا اور ٹوئٹر کے مالک ایلن مسک کی دولت میں حیرت انگیز گراوٹ، 200 ارب ڈالر دیکھتے ہی دیکھتے ختم

ٹیسلا اور ٹوئٹر کے چیف ایگزیکٹیو افسر ایلن مسک اپنی دولت سے 200 ڈالر کا خسارہ برداشت کرنے والے پہلے شخص بن گئے ہیں۔ حیرت انگیز بات یہ ہے کہ اس شدید جھٹکے کے باوجود اب بھی مائیکرو بلاگنگ پلیٹ فارم پر وہ چٹکلے بنا رہے ہیں۔ بلومبرگ کی ایک رپورٹ کے مطابق ٹیسلا کے شیئرس میں حالیہ گراوٹ کے بعد مسک کی ملکیت اب گھٹ کر محض 137 ارب ڈالر رہ گئی ہے۔ یعنی ان کی دولت جو کچھ وقت پہلے تقریباً 337 ارب ڈالر تھی، وہ دیکھتے ہی دیکھتے 200 ارب ڈالر نیچے چلی گئی ہے۔

بتایا جاتا ہے کہ ایلن مسک کی الیکٹرک کار کمپنی کے شیئرس میں تقریباً 65 فیصد کی گراوٹ آئی ہے۔ جنوری 2021 میں مسک پہلی بار 185 ارب ڈالر سے زیادہ کی ملکیت کے ساتھ دنیا کے سب سے امیر شخص بنے تھے۔ دولت میں زبردست گراوٹ سے پہلے ایلن مسک نے نومبر 2021 میں 340 ارب ڈالر تک اپنی ملکیت پہنچا دی تھی۔ لیکن پھر زوال کا دور شروع ہوا۔

گزشتہ ماہ ان کی جگہ لگژری برانڈ لوئس وئیٹن کی بنیادی کمپنی ایل وی ایم ایچ کے چیف ایگزیکٹیو افسر برنارڈ ارنالٹ کو دنیا کے سب سے امیر شخص کی شکل میں پہچانا گیا۔ 44 ارب ڈالر میں ٹوئٹر کو خریدنے کے بعد ٹیسلا کے سی ای او کی ملکیت پہلے ہی کم ہو گئی تھی، اور اب تو اس میں مزید کمی دیکھنے کو ملی ہے۔

پیر کے روز جب ایک فالوور نے ٹوئٹ کیا کہ ’’آپ نے اس سال سخت محنت کی اور 200 ارب ڈالر سے زیادہ گنوا دیا اور اس سال آپ مزید برے فیصلوں سے مزید نقصان اٹھائیں گے، مسک نے جواب دیا- مجھے 8 ڈالر دینے کے لیے شکریہ۔‘‘ ایک دیگر فالوور نے پوسٹ کیا ’’آپ کا سال خراب رہا ہے کیونکہ آپ نے بازار میں بہت پیسہ گنوا دیا ہے، تو یاد رکھیں کہ ایلن مسک کو 200 ارب ڈالر کا نقصان ہوا ہے اور وہ اب بھی ٹوئٹر پر جوکس بنا رہے ہیں۔‘‘

اس درمیان ٹیسلا نے اپنے ماڈل 3 اور ماڈل وائی گاڑیوں کے لیے 7500 ڈالر کی چھوٹ کی پیشکش کرتے ہوئے زیادہ گاڑیوں کو فروخت کرنے کے لے اپنے کئی ماڈلز کی قیمتوں میں گراوٹ کا اعلان کیا ہے۔