’یوکرین کو ملنی چاہیے سیکورٹی کی ضمانت‘، ٹرمپ-پوتن کی میٹنگ کے بعد زیلنسکی کی حمایت میں آیا یورپی یونین

الاسکا میں امریکی صدر ڈونلڈ ٹرمپ اور روس کے صدر ولادمیر پوتن کی میٹنگ کے بعد یورپی یونین کے ممالک کا ردعمل سامنے آیا ہے۔ یورپی یونین کے لیڈران نے یوکرین کی حمایت جاری رکھنے کا اعلان کیا ہے۔ ساتھ ہی یہ مطالبہ کیا گیا ہے کہ یوکرین کو سیکورٹی کی ضمانت ملنی چاہیے۔ بیان میں کہا گیا ہے کہ یورپی ممالک اپنا کردار ادا کرنے کو تیار ہیں۔ ساتھ ہی یہ بھی کہا گیا ہے کہ یورپی یونین یوکرین کی سرحدوں میں جبراً کسی بھی قسم کی تبدیلی برداشت نہیں کرے گا۔

یورپی یونین کے صدر وان ڈیر لیین، صدر میکرون، وزیر اعظم میلونی، چانسلر فریڈرک مرز، وزیر اعظم اسٹارمر، صدر اسٹب، وزیر اعظم ٹسک اور صدر کوسٹا کی طرف سے جاری مشترکہ بیان میں کہا گیا ہے کہ ’’امریکی صدر ٹرمپ نے 15 اگست کو الاسکا میں روسی صدر سے ملاقات کے بعد ہمیں اور صدر زیلنسکی کو تفصیلی معلومات فراہم کیں۔‘‘ بیان میں کہا گیا ہے کہ لیڈران نے یوکرین میں قتل عام کو روکنے، روس کی جارحانہ جنگ کو ختم کرنے، منصفانہ اور دیرپا امن کے قیام کے لیے ڈونلڈ ٹرمپ کی کوششوں کا خیرمقدم کیا۔ جیسا کہ صدر ٹرمپ نے کہا تھا کہ ’’جب تک کوئی سمجھوتہ نہیں ہوتا، تب تک کوئی ڈیل نہیں ہوگی۔‘‘ ٹرمپ یوکرین کے صدر زیلنسکی کے ساتھ مزید بات چیت کے لیے جلد ہی ملنے والے ہیں۔

بیان میں کہا گیا ہے کہ ہم یورپی تعاون کے ساتھ ایک سہ فریقی سربراہی اجلاس کی سمت میں ڈونلڈ ٹرمپ اور زیلنسکی کے ساتھ کام کرنے کے لیے بھی تیار ہیں۔ یوکرین کو اپنی خود مختاری اور علاقائی سالمیت کے مؤثر طریقے سے حفاظت کے لیے ٹھوس سیکورٹی کی ضمانتیں ملنی چاہئیں۔ ہم صدر ٹرمپ کے اس بیان کا خیرمقدم کرتے ہیں کہ امریکہ سیکورٹی کی گارنٹی دینے کے لیے تیار ہے۔ رضامند اتحاد فعال کردار ادا کرنے کو تیار ہے۔ یوکرین کی مسلح افواج یا  تیسرے ممالک کے ساتھ اس کے تعاون پر کوئی پابندی نہیں لگائی جانی چاہیے۔ روس، یورپی یونین اور نیٹو تک رسائی کے لیے یوکرین کے راستے پر ویٹو کا حق نہیں رکھا سکتا ہے۔

یورپی یونین کے بیان کے مطابق یوکرین پر منحصر ہے کہ وہ اپنی سرزمین کے بارے میں کیا فیصلہ لیتا ہے، بین الاقوامی سرحدوں کو جبراً نہیں بدلا جانا چاہیے۔ یوکرین کو ہماری حمایت جاری رہے گی۔ یوکرین کو مزید مضبوط بنائے رکھنے کے لیے پُرعزم ہیں، تاکہ جنگ ختم ہو اور ایک منصفانہ و دیرپا امن قائم ہو۔ ساتھ ہی بیان میں کہا گیا کہ جب تک یوکرین میں قتل عام جاری رہیں گی، ہم روس پر دباؤ بنائے رکھنے کے لیے تیار ہیں۔ ہم روس کی جنگی معیشت پر دباؤ بنانے کے لیے پابندیوں اور وسیع معاشی ترکیبوں کو تب تک مضبوط کرتے رہیں گے جب تک کہ ایک منصفانہ اور دیرپا امن قائم نہیں ہو جاتا۔

دوسری جانب میٹنگ کے بعد فرانس کے صدر ایمانویل میکرون نے سوشل میڈیا پلیٹ فارم ’ایکس‘ پر ایک پوسٹ کیا۔ پوسٹ میں انہوں نے لکھا کہ ’’الاسکا میں صدر ٹرمپ اور صدر پوتن کے درمیان ملاقات کے بعد آج صبح صدر ٹرمپ، صدر زیلنسکی اور یورپی اتحادیوں کے ساتھ ایک رابطہ اجلاس منعقد ہوا۔‘‘ ساتھ ہی انہوں نے کہا کہ اس ملاقات کے اختتام پر ہم نے اپنے یورپی اتحادیوں کے ساتھ بات چیت جاری رکھی۔ ہم اس پر متفق ہیں:

• یوکرین کی حمایت جاری رکھیں گے اور روس پر اس وقت تک دباؤ برقرار رکھنا ضروری ہے جب تک کہ اس کی جارحیت کی جنگ جاری رہے گی اور جب تک یوکرین کے حقوق کا احترام کرتے ہوئے ایک ٹھوس اور دیرپا امن قائم نہ ہو جائے۔

• کسی بھی پائیدار امن کے ساتھ مستحکم سیکورٹی کی گارنٹی ہونی چاہیے۔ میں اس سلسلے میں تعاون کے لیے امریکہ کے پہل کا خیرمقدم کرتا ہوں۔ ہم اس پر ان کے ساتھ اور اپنے تمام شراکت داروں کے ساتھ مل کر کام کریں گے۔ ہم جلد ہی دوبارہ ملاقات کریں گے، تاکہ ٹھوس پیش رفت ہو سکے۔

• ہم اتحاد اور ذمہ داری کے جذبے سے اپنے مفادات کے دفاع کے لیے مل کر کام کرنا جاری رکھیں گے۔ فرانس مکمل طور پر یوکرین کے ساتھ ہے۔