ہندوستانیوں کو ملک بدر کریں ٹرمپ، امریکی لیڈر کے بیان پر مچا وبال

 امریکہ میں رہنے والے ہندوستانیوں کے بارے میں قابل اعتراض تبصرے پرامریکی ریاست فلوریڈا کے لیڈر چینڈلر لینگیوین کی شدید تنقید کی جارہی ہے۔ ہندوستانیوں کو ملک بدر کرنے کے بارے میں ان کے متنازعہ تبصروں کی وجہ سے ہفتہ (18 اکتوبر) کوسٹی کونسل نے انہیں سخت پھٹکار لگائی۔

واشنگٹن پوسٹ کی ایک رپورٹ کے مطابق سٹی کونسل کے فیصلے کے مطابق اب لینگوین کو کسی بھی معاملے کو ایجنڈے میں شامل کرنے سے پہلے اتفاق رائے قائم کرنا ہوگی۔ اس کے علاوہ اس مذمتی قرارداد کے تحت لیڈر کو کمشنروں کے بارے میں تبصرے کرنے سے بھی ہٹا دیا جائے گا۔

سوشل میڈیا پر کئی پوسٹ میں فلوریڈا کے سینیٹروں نے یونائٹیڈ اسٹیٹ آف امریکہ سے ہندوستانیوں کو ملک بدر کرنے کا اعلان کیا تھا۔ ایسی ہی ایک پوسٹ میں انہوں نے لکھا کہ ایک بھی ہندوستانی ایسا نہیں ہے جو یونائٹیڈ اسٹیٹ امریکہ کی پرواہ کرتا ہو۔ انہوں نے مزید کہا کہ وہ ہمارا اقتصادی استحصال کرنے اور ہندوستان اور ہندوستانیوں کو مالا مال کرنے کے لیے آئے ہیں۔ امریکہ امریکیوں کے لیے ہے۔

اپنے تبصروں کی وجہ سے شرمندگی کا سامنا کرنے کے بعد امریکی لیڈر چینڈلر لینگیوین نے اپنی صفائی دی۔ انہوں نے کہا کہ میرا تبصرہ عارضی ویزا رکھنے والوں کے بارے میں تھا، نہ کہ ہندوستانی امریکی کمیونٹی کے بارے میں۔

ایک اور پوسٹ میں لینگوین نے ہندوستانیوں پر امریکہ کا فائدہ اٹھانے کا الزام لگایا۔ غور طلب ہے کہ ہندوستانی نژاد ہرجندر سنگھ پر فلوریڈا ٹرن پائیک پر غیر قانونی یو ٹرن لینے کے بعد تین لوگوں کے قتل کا الزام عائد کیا گیا تھا۔ 2 اکتوبر کی ایک پوسٹ میں لینگوِن نے امریکی صدر ڈونا لڈ ٹرمپ سے یوم پیدائش کی مبارکباد کے طور پر تمام ہندوستانیوں کے ویزا منسوخ کر نے کی اپیل کی تھی۔

لینگوین نے’ ایکس‘ پر لکھا کہ آج میری سالگرہ ہے اور میں صرف یہ چاہتا ہوں کہ ڈونالڈ ٹرمپ تمام ہندوستانیوں کے ویزے منسوخ کر دیں اور انہیں فوری طور پر ملک بدر کر دیں۔ صحافیوں سے بات کرتے ہوئے امریکی رہنما نے کہا کہ ہندوستانی صرف امریکیوں کی جیبیں خالی کرنے کے لیے ہیں۔