ٹرمپ کی کابینہ میں ایک اور ہندوستانی نژاد شخصیت، ہرمیت ڈھلوں اسسٹنٹ اٹارنی جنرل منتخب

واشنگٹن: امریکہ کے نو منتخب صدر ڈونلڈ ٹرمپ نے اپنی کابینہ میں ایک اور ہندوستانی نژاد شخصیت کو شامل کیا ہے۔ مشہور امریکی وکیل ہرمیت کور ڈھلوں کو اسسٹنٹ اٹارنی جنرل کے طور پر نامزد کیا گیا ہے۔ ہرمیت ڈھلوں اظہار رائے کی آزادی اور آئینی حقوق کے تحفظ میں اہم کردار ادا کرتی رہی ہیں اور سکھ برادری سے تعلق رکھتی ہیں۔

ٹرمپ نے اپنے سوشل میڈیا بیان میں ہرمیت ڈھلوں کی صلاحیتوں کی تعریف کی۔ انہوں نے کہا کہ ہرمیت نے ٹیکنالوجی کمپنیوں کی سینسرشپ کے خلاف آواز بلند کی اور کارپوریٹ کی امتیازی پالیسیوں کے خلاف قانونی مقدمات دائر کیے۔ ہرمیت ڈھلوں کا شمار ملک کی بہترین الیکشن اٹارنیز میں ہوتا ہے۔ انہیں سکھ برادری کا ایک نمایاں رکن مانا جاتا ہے اور اب وہ محکمہ انصاف میں آئینی حقوق کی محافظ کے طور پر خدمات انجام دیں گی۔

ہرمیت ڈھلوں کی زندگی:

ہرمیت کے ڈھلوں 2 اپریل 1969 کو چنڈی گڑھ، ہندوستان میں پیدا ہوئیں۔ جب وہ دو سال کی تھیں تو ان کا خاندان امریکہ منتقل ہو گیا۔ ان کی پرورش نارتھ کیرولائنا میں ہوئی لیکن بعد میں وہ نیویارک چلی گئیں۔

ہرمیت نے ڈارٹماؤتھ کالج سے انگریزی میں گریجویشن کیا اور اپنے پیشہ ورانہ سفر کا آغاز بطور لا کلرک کیا۔ بعد میں انہوں نے محکمہ انصاف کے کانسٹیٹوشنل ٹورٹس سیکشن کے لیے کام کیا اور 2006 میں اپنی لا فرم ’ڈھلوں لا گروپ‘ کی بنیاد رکھی۔

ہرمیت اس وقت عوام میں مشہور ہوئیں جب ریپبلکن نیشنل کنونشن میں، جہاں ڈونلڈ ٹرمپ بھی موجود تھے، انہوں نے ایک مذہبی دعا ’ارداس‘ کی۔ ان کی اس شمولیت کو سکھ برادری نے بہت سراہا۔