ایران-اسرائیل جنگ 2.0 کے آثار! ایران کے بوشہر میں آسمان پر نظر آئی نامعلوم شئے، ڈیفنس سسٹم فعال

ایران اور اسرائیل کے درمیان جنگ بندی جاری ہے، لیکن ’جنگ 2.0‘ کے آثار نمایاں ہو رہے ہیں۔ ایسا لگتا ہے کہ ان دونوں ممالک کے درمیان کسی بھی وقت جنگ کا دوسرا دور شروع ہو سکتا ہے۔ امکان ظاہر کیا جا رہا ہے کہ اس مرتبہ حملہ اسرائیل نہیں بلکہ ایران کر سکتا ہے۔ ایران کے اس حملے کا سبب وہ دھماکے بنیں گے جو ایرانی شہروں میں گزشتہ 6 دنوں سے لگاتار ہو رہے ہیں۔

ایک میڈیا رپورٹ میں بتایا گیا ہے کہ مختلف شہروں میں ہو رہے دھماکوں کو ایران جنگ بندی کی خلاف ورزی قرار دیتے ہوئے اسرائیل پر حملہ کر سکتا ہے۔ ایرانی حملے کا اندیشہ اس لیے بھی بڑھ گیا ہے، کیونکہ سپریم لیڈر آیت اللہ علی خامنہ ای کی فوج نے گزشتہ جنگ سے سبق لیتے ہوئے اپنی کمزوریوں کو بہت حد تک دور کر لیا ہے۔

ہندی نیوز پورٹل ’ٹی وی 9 بھارت وَرش‘ پر شائع ایک خبر میں بتایا گیا ہے کہ ایران کے بوشہر میں لگاتار آسمان میں کچھ نامعلوم شئے دکھائی دے رہی ہیں۔ نتیجہ کار ایرانی ڈیفنس سسٹم فعال ہو چکا ہے۔ ایئر ڈیفنس نے کئی انٹرسپٹر میزائلیں فائر بھی کی ہیں۔ تہران میں کچھ دھماکوں کی رپورٹ بھی سامنے آئی ہے۔ ایک رہائشی علاقہ میں بھی دھماکہ سے عمارت میں آگ لگ گئی ہے۔ جنگ بندی کے باوجود اس طرح کے حملے لگاتار ہو رہے ہیں۔ حالانکہ ابھی تک ایران کی طرف سے اس پر کوئی رد عمل ظاہر نہیں کیا گیا ہے۔ یہ بھی مصدقہ نہیں ہے کہ یہ حملے اسرائیل کی ہی طرف سے کیے جا رہے ہیں۔ اچھی بات یہ ہے کہ ایران کی طرف سے ان دھماکوں پر کوئی رد عمل ظاہر نہیں کیا گیا ہے۔ لیکن ایران کی طرف سے طاری سناٹے کو کسی بڑے طوفان کا اشارہ بھی تصور کیا جا سکتا ہے۔ یعنی ایران کبھی بھی ان دھماکوں کو جنگ بندی کی خلاف ورزی بتا کر اسرائیل پر بڑا حملہ کر سکتا ہے۔

قابل ذکر بات یہ بھی ہے کہ دنیا کی کئی خفیہ ایجنسیوں نے اس بات کی رپورٹ دی ہے کہ ایران اور اسرائیل کے درمیان کسی بھی وقت جنگ شروع ہو سکتی ہے۔ گزشتہ جنگ سے سبق لیتے ہوئے ایران اپنے دوست ممالک روس اور چین کی مدد سے اپنی کمزوری دور کر رہا ہے۔ انہی دونوں ممالک کی مدد سے وہ اپنی فوجی طاقت بھی بڑھا رہا ہے۔ ایرانی فوج کی جو چند کمزوریاں ہیں، وہ جیسے ہی دور ہوں گی، اسرائیل پر حملہ ہو سکتا ہے۔ یہ حملہ ’ایران-اسرائیل جنگ 2.0‘ ہوگا، اور اس کا انجام کیا ہوگا، یہ بتانا ممکن نہیں۔