لاس اینجلس کی جنگلاتی آگ: 5 ہلاکتیں، 10 ہزار ایکڑ تباہ، ہالی وڈ کے کریٹکس چوائس ایوارڈز ملتوی

لاس اینجلس کے جنگلات میں لگی خوفناک آگ نے 10000 ایکڑ سے زائد رقبے کو اپنی لپیٹ میں لے لیا ہے، جس کے نتیجے میں پانچ افراد ہلاک اور ہزاروں مکانات کو نقصان پہنچا ہے۔ لاس اینجلس کاؤنٹی کے فائر چیف انتھونی میرون کے مطابق، ایٹن کے علاقے میں لگی آگ اب تک 10600 ایکڑ تک پھیل چکی ہے اور اس پر قابو پانے کی کوششیں جاری ہیں۔ انہوں نے بتایا کہ بدقسمتی سے پانچ شہریوں کی موت واقع ہو چکی ہے اور کچھ زخمی بھی ہوئے ہیں۔ اب تک ایک ہزار سے زائد گھروں یا عمارتوں کو نقصان پہنچا ہے یا وہ مکمل طور پر تباہ ہو چکی ہیں۔

آگ کی شدت اور تیز ہواؤں کے باعث، ایریزونا سمیت دیگر ریاستوں سے فائر فائٹرز کی مدد طلب کی گئی ہے۔ حکام نے ایمرجنسی نافذ کرتے ہوئے شہریوں کو محفوظ مقامات پر منتقل ہونے کی ہدایات جاری کی ہیں۔

دریں اثنا، لاس اینجلس میں جنگلاتی آگ کے باعث ہالی وڈ نے اپنی سالانہ کریٹکس چوائس ایوارڈز کی تقریب ملتوی کر دی ہے، خبر رساں ادارے اے ایف پی نے منتظمین کے حوالے سے بتایا۔ یہ تقریب اصل میں اس ویک اینڈ پر ہونی تھی۔

کریٹکس چوائس ایسوسی ایشن کے سی ای او جوی برلن نے کہا کہ یہ تقریب، جو ہر سال فلم اور ٹیلی ویژن میں بہترین کارکردگی پیش کرنے والوں کو اعزاز دینے کے لیے منعقد کی جاتی ہے اور جس میں درجنوں معروف ستارے شرکت کرتے ہیں، اب اتوار کو نہیں ہوگی۔ خبر رساں ادارے اے پی کے مطابق کریٹکس چوائس ایوارڈز کی تقریب اب 26 فروری تک مؤخر کر دی گئی ہے۔