اسرائیلی حملہ کے دوران خامنہ ای بنکر میں تھے ہی نہیں، وہ تو آپریشن روم میں تھے!

اسرائیل اور ایران کے بیچ جب جنگ ہوئی تھی تو ایسی خبریں سامنے آئی تھیں کہ ایران کے سپریم لیڈر آیت اللہ علی خامنہ ای بنکر میں چھپ گئے ہیں۔ اب جبکہ اس جنگ بندی کے تقریباً 50 دن ہو گئے ہیں، ایک اہم انکشاف سپریم لیڈر کے ایک قریبی نے کیا ہے۔ سیکورٹی کونسل کے سکریٹری اور خامنہ ای کے قریبی علی لاریزانی نے دعویٰ کیا ہے کہ جنگ کے دوران سپریم لیڈر بنکر میں نہیں، بلکہ آپریشن روم میں بیٹھے ہوئے تھے۔ آپریشن روم سے ہی وہ سبھی چیزوں کی مانیٹرنگ کر رہے تھے۔

یہ انکشاف لاریزانی نے ’المائدین‘ کو دیے گئے انٹرویو میں کیا ہے۔ انھوں نے کہا کہ ایران میں کچھ اندرونی دقتیں ضرور ہیں، اس کے باوجود جنگ کے دوران سبھی متحد رہے۔ ہمارے لیڈر لگاتار فعال رہے، خود آپریشن روم سے چیزوں کی مانیٹرنگ کر رہے تھے۔ لگاتار فوج کو ہدایات دے رہے تھے۔ اسی کا اثر تھا کہ فوج اسرائیل پر پوری طاقت کے ساتھ میزائلیں داغ رہی تھی۔

لاریزانی کا کہنا ہے کہ جنگ کی تیاری اسرائیل 14 سالوں سے کر رہا تھا۔ شروع میں ہی اس نے ایران کے کئی بڑے کمانڈرس کا قتل کر دیا تھا۔ لاریزانی یہ بھی کہتے ہیں کہ ’’مجھے بھی مارنے کی دھمکی ملی۔ اس کے باوجود اسرائیل اپنے منصوبوں میں ناکام رہا۔ وہ جو چاہتا تھا، ایران نے اسے نہیں ہونے دیا۔‘‘ لاریزانی کے مطابق ایرانی لیڈر نے صبر سے کام لیا۔ ہر دن آپریشن روم میں ایکٹیو رہے۔ جب ضرورت محسوس کی، تب ویڈیو بنا کر دنیا اور ملک کو خطاب کیا۔ لوگ ان کے ساتھ متحد رہے۔ اسرائیل کی حکومت ایران میں تختہ پلٹ نہیں کر پائی۔

لاریزانی نے انٹرویو میں دعویٰ کیا کہ جب تک اسرائیل کے اقتدار پر بنجامن نیتن یاہو قابض رہیں گے، تب تک مشرق وسطیٰ پرسکون نہیں ہوگا۔ اپنے فائدے کے لیے نیتن یاہو ہر دن کسی نہ کسی ملک پر حملہ کرتے ہیں۔ ایران اور لبنان پر کچھ الگ الزام لگا کر حملہ کر دیا، لیکن بتائیے شام میں بھی حملہ کر دیا، جس کی مخالفت امریکہ نے ہی کر دی۔ لاریزانی کہتے ہیں کہ اسلامی حکومت کو مضبوط کرنا ہے تو سبھی ممالک کو متحد ہونا ہوگا۔ اسرائیل دھیرے دھیرے اپنا دائرہ بڑھا رہا ہے، اس کا رقبہ لگاتار بڑھ رہا ہے۔

واضح رہے کہ 12 دنوں تک چلی اسرائیل-ایران جنگ کے دوران سپریم لیڈر خامنہ ای کے بنکر میں چھپنے کی خبر سامنے آئی تھی۔ اس وقت ایران انٹرنیشنل اور نیویارک ٹائمز نے ذرائع کے حوالے سے لکھا تھا کہ خامنہ ای کو بچانے کے لیے ایرانی فوج نے انھیں تہران واقع بنکر میں چھپا دیا ہے۔ جنگ کے دوران موساد کے جاسوس خامنہ کو نشانے پر لینا چاہتے تھے، لیکن وہ ناکام رہے۔ اب لاریزانی کے انکشاف نے اس معاملے کو ایک نیا رخ دے دیا ہے۔