اسرائیلی ایئرلائن ترکیہ کے لیے پروازیں دوبارہ شروع کرے گی

یروشلم: اسرائیل ایئر لائنز 15 سال بعد ترکیہ کے لیے پروازیں دوبارہ شروع کرنے کے لیے تیار ہے۔ اسرائیل کی وزارت ٹرانسپورٹ اور خارجہ امور کی جانب سے جاری ایک بیان کے مطابق دونوں ممالک کے درمیان طے پانے والے ہوابازی معاہدے کے تحت ترکیہ کے مختلف مقامات کے لیے پروازیں دوبارہ شروع کرنے کی اجازت دی گئی ہے۔

اسرائیلی ایئر لائنز نے 15 سال قبل سیکیورٹی پابندیوں اور بے تحاشہ اخراجات کی وجہ سے ترکیہ کے لیے پروازیں روک دی تھیں۔ اس وقت صرف بڑی ترک کمپنیاں ترکش ایئر لائنز اور پیگاسس ایئر لائنز دونوں ممالک کے درمیان روٹس پر پروازیں کرتی ہیں۔

بیان میں کہا گیا ہے کہ نیا معاہدہ دونوں ممالک کے درمیان ہوا بازی کے تعلقات کو فروغ دینے اور اقتصادی اور اسٹریٹجک تعلقات کو مضبوط بنانے کی جانب ایک اور اہم قدم ہے۔ اس ہفتے اسرائیل کے وزیر اقتصادیات اورنا باربیوف نے ترکیہ میں اسرائیل کے اقتصادی اور تجارتی مشن کے دفتر کو دوبارہ کھولنے کا اعلان کیا تھا۔