الوداعی خطاب میں ٹرمپ نے تسلیم کیا، ’کیپیٹل ہل پر تشدد امریکی جمہوریت کا کالا دن‘

آج جو بائیڈن امریکہ کے 46 ویں صدر کی حیثیت سےحلف لیں گے جس کے ساتھ ڈونالڈ ٹرمپ کےدور کا اختتام ہوجائے گا۔ ڈونالڈ ٹرمپ جنہوں نے جو بائیڈن کی حلف برداری کی تقریب میں شرکت سے انکار کیا ہے اور اگر ایسا ہوتا ہے تو یہ پہلا موقع ہوگا جب کوئی جانے والا صدر نئے صدر کی حلف برداری کی تقریب میں شرکت نہیں کرےگا۔صدر ٹرمپ نےجو اپناالوداعی پیغام جاری کیا ہےوہ پہلے سے ریکارڈ کیا ہو اہے۔صدر ٹرمپ نے نومنتخب صدر جو بائیڈن کو مبارکباد دی ہے اور کیپیٹل ہل پر پر تشدد حملے کی دو ٹوک الفاظ میں مذمت کی ہے۔

ٹرمپ نے اپنے ویڈیو پیغام میں کہا ہےکہ ’’تمام امریکی کیپیٹل ہل پرہوئے حملے سے خوفزدہ تھے۔ سیاسی تشدد امریکہ کی وراثت پر حملہ ہے جسےکبھی بھی برداشت نہیں کیا جا سکتا اور یہ جمہوری امریکہ کا ایک کالا دن تھا۔‘‘

انہوں نےکوروناوبا اور چین کا ذکرکرتے ہوئے کہا کہ ’’چین کے ساتھ ہم نے (امریکہ نے) نئی حکمت عملی پر عمل کیا تھا اور ہمارےتجارتی تعلقات تیزی سے بدل رہے تھےجس کی وجہ سےاربوں ڈالر کی امریکہ میں سرمایہ کاری ہو رہی تھی لیکن کورونا وائرس نے ہمیں الگ سمت میں جانےکےلئے مجبور کیا ۔‘‘

ٹرمپ نے اپنے 19 منٹ کےاس ویڈیو پیغام میں کہا کہ امریکہ کا صدر ہونا ان کےلئے بہت بڑے اعزاز کی بات تھی۔ انہوں نےکہا کہ ان کی انتظامیہ نے تمام امریکی شہریوں کو پھر سے عظیم بنانے کا مشن شروع کیااور امریکی معیشت کو دنیا کی سب سے بڑی معیشت بنایا۔

ٹرمپ نے جہاں جو بائیڈن کی کامیابی کےلئے نیک خواہشات پیش کیں وہیں انہوں نے نئی انتظامیہ کو انتباہ بھی کیا کہ امریکہ کو مستقل بیرونی قووتوں سےخطرہ ہےلیکن سب سے بڑا خطرہ امریکہ کو اس بات سے ہے کہ امریکہ اپنا اعتماد کھو رہا ہے۔انہوں نے کہا کہ ہم اپنے عظیم ہونے کا اعتماد کھو رہےہیں۔