'اصل مسائل پر توجہ دیں تاکہ یورپ جیسی حالت نہ ہو' زیلنسکی کی حمایت کرنے والوں پر ٹرمپ نے کسا طنز

یوکرینی صدر زیلنسکی کی مدد کر رہے یورپی ممالک پر امریکی صدر ڈونالڈ ٹرمپ نے طنز کیا ہے۔ انہوں نے کہا کہ ہمیں پوتن پر توجہ دینے سے زیادہ ضروری یہ ہے کہ ہم اپنے ملک کے اندر اصل مسائل پر توجہ دیں تاکہ ہماری حالت یورپ جیسی نہ ہو۔

ٹرمپ نے یہ طنز ایسے وقت میں کیا ہے جب گزشتہ روز برطانوی وزیر اعظم کیئر اسٹارمر نے اربوں ڈالر کے ساتھ یوکرین کی مدد کرنے کا اعلان کیا تھا۔ ان کے اس فیصلے میں کئی دیگر یورپی ملک بھی شامل تھے۔ ساتھ ہی یوکرین-روس جنگ کے حل کو لے کر کئی یورپی ملکوں نے لندن میں ایک مشترکہ میٹنگ میں شرکت بھی کی جس میں زیلنسکی بھی شامل تھے۔

امریکی صدر ڈونالڈ ٹرمپ نے آج سوشل میڈیا پلیٹ فارم 'ٹروتھ سوشل' پر یورپی ملکوں کو لے کر اپنا غصہ نکالا۔ ٹرمپ نے لکھا، "ہمیں پوتن کے بارے میں کم سوچنا چاہیے۔ اس کی جگہ ہمیں اپنے ملک میں آ رہے غیر قانونی تارکین وطن، ریپسٹ گینگس، ڈرگس مافیاؤں، قاتلوں اور ذہنی طور پر بیمار لوگوں کے بارے میں زیادہ سوچنا چاہیے تاکہ آج جو یورپ کے حالات ہیں ویسے ہمارے نہ ہونے پائیں۔"

واضح ہو کہ جمعہ کو اوول آفس میں ٹرمپ اور زیلنسکی کے درمیان ہوئی زوردار بحث نے یوکرین اور امریکہ کے رشتوں پر سوالیہ نشان لگا دیا ہے۔ بات چیت کے بعد وہائٹ ہاؤس میں معدنی ڈیل کرنے آئے زیلنسکی بغیر کوئی ڈیل کیے ہی وہاں سے نکل گئے تھے۔ اس کے بعد یورپی ممالک سامنے آئے اور انہوں زیلنسکی کے لیے اپنی بھرپور حمایت دکھائی۔ زیلنسکی کو اس طرح کی حمایت ملنے کے بعد ٹرمپ پر اس کا اثر پڑنے والا ہی تھا اس لیے طنز کے طور پر ان کا رد عمل سامنے آیا ہے۔