امریکہ میں برفانی طوفان کا قہر، 18ریاستوں میں ایمرجنسی، ہزاروں لوگ بجلی سے محروم، 13ہزار پروازیں منسوخ

امریکہ کی متعدد ریاستیں اس وقت بھیانک اور تباہ کن برفانی طوفان کی زد میں ہیں، جہاں شدید برفباری اور بارش کے باعث نظامِ زندگی بری طرح متاثر ہو گیا ہے۔ خبروں کے مطابق امریکہ کی 40 فیصد سے زیادہ آبادی یعنی تقریباً 20 کروڑ سے زائد افراد متاثر ہونے کا خدشہ ظاہر کیا جا رہا ہے جبکہ ملک کی 18 ریاستوں میں ایمرجنسی نافذ کر دی گئی۔ اس سلسلے میں نیو میکسیکو سے لے کر نیو انگلینڈ تک برفانی طوفان کی وارننگ کے دائرے میں ہیں۔

اس دوران نیشنل ویدر سروس نے ہفتہ سے پیر تک جنوبی راکی سے نیو انگلینڈ تک شدید برفباری، تیز ہواؤں اور جما دینے والی بارش کی پیش گوئی کی ہے۔ نیشنل ویدر سروس کے ماہر موسمیات ایلیسن سنٹوریلی نے کہا کہ برف بہت آہستہ آہستہ پگھلے گی اور جلدی کم نہیں ہوگی، جس سے امدادی سرگرمیوں میں نمایاں طور پر رکاوٹ پیدا ہوگی۔

امریکی صدر ڈونالڈ ٹرمپ نے ہفتے تک ایک درجن ریاستوں کے لیے ایمرجنسی کے اعلان کی منظوری دے دی تھی اورآئندہ بھی ریاستوں کے لیے مزید اعلان کیے جانے کی توقع ہے۔ ہوم لینڈ سیکیورٹی کی سیکریٹری کرسٹی نوم نے بتایا کہ فیڈرل ایمرجنسی مینجمنٹ ایجنسی نے کئی ریاستوں میں ضروری سامان، اہلکار اور تلاش اور بچاؤ ٹیمیں تعینات کر دی ہیں۔ نوم نے کہا کہ ہم صرف یہی اپیل کرتے ہیں کہ سبھی لوگ سمجھداری سے کام لیں اور اگر ممکن ہو تو گھر کے اندر ہی رہیں۔

’پاور آوٹیج یوایس‘کے مطابق برفانی طوفان کی وجہ سے ہفتے کے روز تقریباً 120,000 بجلی کٹوتی کی اطلاع ملی، جس میں ٹیکساس اور لوزیانا میں تقریباً 50۔ 50 ہزار بجلی کٹوتی شامل ہیں۔ لوزیانا سرحد کے پاس ٹیکساس، شیلبی کاؤنٹی میں برف کے وزن سے درخت ٹوٹ گئے جس سے بجلی کی تاریں گر گئیں۔ کاؤنٹی کے 16,000 رہائشیوں میں سے تقریبا ایک تہائی لوگوں کو بجلی سپلائی منقطع ہوگئی ہے۔ فلائٹ ٹریکنگ ویب سائٹ کے مطابق ہفتہ اور اتوار کو امریکہ بھر میں تقریباً 13000 پروازیں منسوخ کی گئیں۔ اوکلاہوما سٹی کے ول راجرز انٹرنیشنل ایئرپورٹ پر ہفتے کی تمام پروازیں منسوخ کر دی گئیں اور اتوار کی صبح کی تمام پروازیں بھی منسوخ کر دی گئیں۔

اس دوران نیویارک کے میئر نے شہریوں کو غیر ضروری سفر سے گریز اور گھروں میں رہنے کی ہدایات جاری کی ہیں جب کہ 9 ریاستوں میں نیشنل گارڈز کو متحرک کردیا گیا ہے۔ شدید برفانی طوفان کے باعث امریکہ بھر میں 84 ہزار سے زائد صارفین بجلی کی فراہمی سے محروم ہوگئے ہیں۔ اس دوران امریکی صدر نے کہا ہے کہ وفاقی اور ریاستی اداروں کے ساتھ مل کر شہریوں کی حفاظت کو یقینی بنایا جائے گا اور طوفان سے متاثرہ تمام ریاستوں سے مسلسل رابطے میں ہیں۔ حکام کے مطابق صورتحال پر کڑی نظر رکھی جا رہی ہے اور امدادی کارروائیاں جاری ہیں۔