ہندوستان کے بمل پٹیل بین الاقوامی بحری ٹربیونل کے جج منتخب

اقوام متحدہ: ہندوستان کے ممتاز قانون داں بمل پٹیل کو بین الاقوامی بحری ٹربیونل کا جج منتخب کیا گیا ہے۔ وہ ستمبر میں اپنے عہدے کا چارج سنبھالیں گے۔ ان کا انتخاب اقوام متحدہ کے سمندری قانون کنونشن کے رکن ممالک کی جانب سے کیا گیا ہے۔ بمل پٹیل کے انتخاب کے ساتھ اس عالمی ادارے میں ہندوستان کی نمائندگی کا تسلسل برقرار رہے گا، کیونکہ موجودہ نائب صدر نیرو چڈھا ستمبر میں اپنی 9 سالہ مدت مکمل کرنے کے بعد سبکدوش ہو جائیں گی۔

بمل پٹیل ایک ممتاز بین الاقوامی قانون داں ہیں اور اس وقت اقوام متحدہ کے بین الاقوامی قانون کمیشن کے رکن ہونے کے ساتھ ساتھ گجرات میں واقع نیشنل ڈیفنس یونیورسٹی کے وائس چانسلر کے طور پر خدمات انجام دے رہے ہیں۔ وہ قومی سلامتی کونسل سکریٹریٹ کے قومی سلامتی مشاورتی بورڈ کے بھی رکن ہیں۔ انہوں نے نیدرلینڈ کی لیڈن یونیورسٹی اور جے پور نیشنل یونیورسٹی سے بین الاقوامی قانون میں ڈاکٹریٹ کی ڈگری حاصل کی ہے۔

اقوام متحدہ میں ہندوستان کے مستقل مشن نے سماجی رابطے کے پلیٹ فارم ایکس پر کہا کہ بمل پٹیل کا انتخاب کثیر جہتی نظام اور بحری قوانین کے تئیں ہندوستان کے دیرینہ عزم کو مزید مستحکم کرتا ہے۔ ہندوستانی سفارت کار گزشتہ برس سے اقوام متحدہ میں ان کے حق میں حمایت حاصل کرنے کی مہم چلا رہے تھے۔

اس سال بین الاقوامی بحری ٹربیونل کی سات نشستوں میں سے دو ایشیائی خطے کے لیے مخصوص تھیں، جن پر بمل پٹیل اور ویتنام کی نگوین لن آن تھی منتخب ہوئیں۔ تھائی لینڈ کے موجودہ جج کریانگسک کٹیچاساری، جن کی مدت پوری ہو رہی تھی، دوبارہ انتخاب میں کامیاب نہ ہو سکے، جبکہ انڈونیشیا نے ووٹنگ سے قبل اپنا امیدوار واپس لے لیا تھا۔

بمل پٹیل کو 168 درست ووٹوں میں سے 115 ووٹ حاصل ہوئے۔ یہ انتخاب سمندری قانون کنونشن کے چھتیسویں اجلاس کے دوران منعقد ہوا، جس میں 172 رکن ممالک شریک تھے۔

جرمنی کے شہر ہیمبرگ میں قائم بین الاقوامی بحری ٹربیونل سمندروں اور بحری حدود سے متعلق تنازعات کے تصفیے اور سمندری قوانین کی تشریح کا ایک اہم عالمی ادارہ ہے۔

ہندوستان کے وزیر خارجہ ایس جے شنکر نے بمل پٹیل کو مبارکباد دیتے ہوئے سمندری قانون کنونشن کے رکن ممالک کا شکریہ ادا کیا۔ انہوں نے کہا کہ یہ انتخاب عالمی سطح پر بحری قوانین اور کثیر جہتی تعاون کے لیے ہندوستان کے عزم کی عکاسی کرتا ہے۔