ایران کی فردو جوہری تنصیب پر سرگرمیاں شروع، نئی سیٹلائٹ تصاویر آئیں سامنے

تہران: ایران کی فردو جوہری تنصیب پر سرگرمیوں کی نئی سیٹلائٹ تصاویر سامنے آگئیں، امریکی حملے کے بعد گڑھوں کے اطراف کھدائی اور مشینری کی سرگرمیاں جاری ہیں۔ تفصیلات کے مطابق ایران کی فردو جوہری تنصیب پر سرگرمیوں کی نئی سیٹلائٹ تصاویر جاری کر دی گئیں، امریکی حملے کے بعد گڑھوں کے اطراف کھدائی اور مشینری کی سرگرمیاں جاری ہیں۔

عرب میڈیا کا کہنا ہے کہ ایٹمی تنصیب کے شمالی حصے پر کھدائی کی مشین تصاویر میں نظر آرہی ہیں اور داخلی دروازے کے قریب کرین کام کرتے دیکھی گئی ہے، تنصیب کے راستے پر متعدد گاڑیاں ہیں اور مقام تک رسائی کیلئے نیا راستہ بنایا گیا ہے۔ برطانوی نشریاتی ادارے نے کہا کہ ایران کی جوہری تنصیب فردو کی تازہ سیٹلائٹ تصاویر میں اس مقام پر بھاری مشینری کی موجودگی کی تصدیق ہوئی ہے۔

چند روز قبل بنائی گئی تصویریں 29 جون کو سامنے آئیں، جس میں کھدائی کرنے والی ایک مشین اور کرین کو دیکھا جا سکتا ہے۔ میکسر ٹیکنالوجیز کی تصاویر میں بلڈوزر اور کرین کو سائٹ تک تعمیر کردہ ایک نئی لنک روڈ پر دکھایا گیا ہے، یہ وہی ایرانی جوہری تنصیب ہے جسے امریکا نے بنکر بسٹر بموں سے نشانہ بنایا تھا۔ تعمیراتی مشینری سائٹ کے داخلی دروازے اور کمپلیکس کے مشرقی حصے میں تباہ شدہ عمارت پر کام کرتی دکھائی دے رہی ہے۔

جوہری ہتھیاروں کے ماہر ڈیوڈ البرائٹ کا کہنا ہے کہ یہ تعمیراتی کام میں گڑھوں کو دوبارہ بھرنا، نقصانات کا تخمینہ لگانا اور ریڈیو لوجیکل سیمپلنگ ہوسکتے ہیں۔ میکنزی انٹیلی جنس سروسز میں سینئر امیجری اینالسٹ اسٹو۔ رے نے بی بی سی کو بتایا کہ داخلی راستے پر بڑے دھماکے کے آثار نہیں دکھائی دے رہے، سرنگ کا داخلی راستہ بظاہر بند ہے تاہم اب تک یہ واضح نہیں ہے کہ ان حملوں سے جوہری تنصیب کو کتنا نقصان ہوا ہے۔