بنگلہ دیش میں بچیوں کے لیے دردناک ثابت ہو رہا 2025، رواں سال ابتدائی 7 ماہ میں زنا کے معاملے 75 فیصد بڑھے

بنگلہ دیش میں نابالغ بچیوں کے لیے سال 2025 انتہائی دردناک ثابت ہو رہا ہے۔ ڈھاکہ سے جاری ایک نئی رپورٹ میں مطلع کیا گیا ہے کہ جنوری سے جولائی 2025 تک بچیوں کے ساتھ جنسی استحصال کے 306 کیس درج کیے گئے ہیں۔ یہ 2024 کے مقابلے 75 فیصد زیادہ ہیں۔ غور کرنے والی بات یہ ہے کہ معزول سابق وزیر اعظم شیخ حسینہ نے حال ہی میں یہ الزام عائد کیا تھا کہ بنگلہ دیش میں چھوٹی بچیوں کے خلاف جنسی استحصال کے معاملے بڑھے ہیں۔ تازہ رپورٹ ان کے الزام پر مہر ثابت کرنے والی ہے۔

این او سلیش سنٹر کی رپورٹ میں بتایا گیا ہے کہ جنسی استحصال کی شکار بچیوں کی عمر نے نظامِ قانون پر سوال اٹھا دیے ہیں۔ رپورٹ میں کہا گیا ہے کہ 49 معاملوں میں بچیوں کی عمر صفر سے 6 سال کے درمیان ہے۔ 94 کیسز میں بچیوں کی عمر 7 سے 12 سال ہے، جبکہ 103 کیس میں بچیوں کی عمر 18-13 کے درمیان ہے۔ 60 معاملوں میں عمر کا انکشاف نہیں ہو پایا ہے۔

جاری رپورٹ میں یہ بھی بتایا گیا ہے کہ جنوری 2025 سے جولائی 2025 تک جو 22 کیسز درج کیے گئے ہیں، وہ مدارس یا تعلیمی اداروں میں پیش آئے ہیں۔ اسی طرح زنا کے 49 معاملے سڑکوں پر انجام دیے گئے ہیں۔ پولیس نے جو رپورٹ درج کی ہے، اس کے مطابق ان 49 کیسز میں پہلے بچیوں کا پیچھا کیا گیا، اس کے بعد اسے کہیں نامعلوم مقام پر لے جا کر جنسی استحصال کا شکار بنایا گیا۔ اس رپورٹ میں آگے یہ بھی کہا گیا ہے کہ بچیوں کے خلاف جنسی استحصال کے کیسز میں پولیس سزا نہیں دلا پا رہی ہے۔ 55 کیسز میں تو ابتدائی طور پر ہی کیس خارج ہو گیا۔ پولیس ان بچیوں کو انصاف نہیں دلا پائی۔

فکر انگیز بات یہ بھی ہے کہ بنگلہ دیش میں چھوٹی بچیوں کےس اتھ ساتھ معذور لڑکیاں بھی نشانے پر ہیں۔ رواں سال جون ماہ میں معذور لڑکیوں کے ساتھ عصمت دری کے 7 واقعات درج کیے گئے تھے۔ حقوق انسانی کمیشن نے اسے خوفناک بتایا تھا۔ بنگلہ دیش پولیس کے مطابق 2014 سے لے کر 2024 تک، یعنی گزشتہ 10 سالوں میں چھوٹی بچیوں کے ساتھ جنسی استحصال کے تقریباً 5600 کیسز درج کیے گئے ہیں۔ یہ اوسطاً ہر سال 560 ہوتے ہیں۔