حضرت شیخ سلیم چشتی رحمۃ اللہ علیہ کے 452 ویں سالانہ عرس اختتام پذیر

فتح پور سیکری میں واقع درگاہ حضرت شیخ سلیم چشتی رحمۃ اللہ علیہ کا سالانہ 452 ویں عرس مبارک کا روایتی شان و شوکت کے ساتھ اختتام پذیر ہوا۔ درگاہ کے سجادہ نشین پیرزادہ عیاض الدین چشتی عرف رئیس میاں نے ملک کی امن، سلامتی و دوبارہ سے آرہی کورونا وائرس جیسی وبا سے نجات کے لئے دعا کی۔

انہوں نے کہا لہ صوفیا کا جو پیغام ہے وہ حضرت کے آستانہ میں دیکھا جاسکتاہے جہاں سب مذہب و ملت کے لوگ آکر حاضری دیتے ہیں۔ اس پیغام کو عام کرنے ضرورت ہے۔

حضرت شیخ سلیم چشتی (رح) کے سالانہ عرس مبارک میں قل کی رسم ادا کی گئی۔حضرت شیخ سلیم چشتی رح کے دیوانوں کا یہ عالم تھا کہ وہ اپنی عمر نہیں دیکھ رہے تھے بلکہ حضرت کی دیوانگی میں انکے آستانہ کی جانب تیز قدموں سے بڑھے چلے آ رہے تھے۔ عقیدت مند چادروں کے جلوس کے ساتھ نعرے بلند کرتے ہوئے جھومتے ہوئے چادر پیش کرنے کےلئے لے جا رہےتھے۔درگاہ احاطے میں ایک طرف جہاں لوگ قران پاک کی تلاوت کر رہے تھے تو کوئی اللہ کا ذکر کر رہاتھا۔

عقیدت کا یہ عالم تھا نہ دن کی خبر تھی نہ رات کی۔ شب گزاری میں کب رات گزری اور صبح وہ عظیم وقت قل کا آیا جس کی دعا میں شریک ہونے کے لِے بوڑھا ، بچہ اور نوجوان ایک سے کھیچا چلا آیا۔ واضع ہو کہ جمعہ کے روز مزار مبارک کے غسل شریف کی رسم ادا کی گئی ۔اس کے بعد حضرت شیخ سلیم چشتی رح کے تبرکات کی زیارت کرائی گئی۔

عرس کا عظیم الشان آغاز غسل شریف مزار مبارک سے ہوا ۔ تبرکات کی زیارت کے بعد نماز ظہر تاعصر چلہ گاہ حضرت شیخ سلیم چشتی رح موسومہ منڈف میں حضور سید عالم صلی اللہ علیہ و آلہ و سلم کے قدم مبارک ،حضرت پیران پیر دستگیر حضور پاک خرقہ مبارک ،حضرت بابا فرید مسعود گنج شکر رحمتہ اللہ کا پٹکہ شریف ، حضرت شیخ کی کُلاہ مبارک و قلمی شبیہ کی زیارت حضرت صاحب ِ سجادہ نشین کے دست مبارک سے کرائی گئی ۔ یہ اطلاع حضرت شیخ سلیم چشتی فاونڈیشن کے سیکریٹری اور ولی عہد سجادہ نشین ارشد فریدی نے دی۔