عالمی کپ: خراب کارکردگی کے بعد پاکستانی کرکٹر شعیب ملک نے ریٹائرمنٹ کا کیا اعلان

پاکستانی بلے باز شعیب ملک نے بین الاقوامی کرکٹ سے ریٹائرمنٹ کا اعلان کر دیا ہے۔ عالمی کپ میں بنگلہ دیش کے خلاف آخری مقابلہ ختم ہوتے ہی انھوں نے یہ اعلان کیا۔ شعب اختر کی کارکردگی اس عالمی کپ انتہائی خراب رہی تھی اور پاکستانی میڈیا میں انھیں لگاتار تنقید کا نشانہ بنایا جا رہا تھا۔ شعیب کے شیدائی بھی ان کی کارکردگی سے خوش نہیں تھے اور سوشل میڈیا پر ان کے خلاف کارٹون بھی وائرل ہو رہے تھے۔

پاکستان بمقابلہ بنگلہ دیش میچ کے بعد پریس کانفرنس سے خطاب کرتے ہوئے شعیب ملک نے واضح لفظوں میں کہا کہ ’’میں بین الاقوامی یک روزہ کرکٹ سے سبکدوش ہو رہا ہوں۔ میں نے کچھ سال پہلے ہی فیصلہ کر لیا تھا کہ میں عالمی کپ میں پاکستان کے آخری میچ کے بعد ریٹائرمنٹ لے لوں گا۔‘‘

پریس کانفرنس کے بعد شعیب ملک نے اپنے ٹوئٹر ہینڈل پر لکھا کہ ’’میں نے آج بین الاقوامی یک روزہ کرکٹ سے ریٹائرمنٹ کا اعلان کر دیا۔ ان سبھی کھلاڑیوں کو، جن کے ساتھ میں نے کرکٹ کھیلا، جن کوچوں نے مجھے ٹریننگ دی، فیملی، دوست اور میڈیا سبھی کا شکریہ۔ خاص طور سے میں اپنے شیدائیوں کا بے حد شکرگزار ہوں۔ سبھی کو میرا پیار۔‘‘

اس سے قبل عالمی کپ میں ان کی خراب کارکردگی کو دیکھتے ہوئے ان پر ریٹائرمنٹ کا دباؤ بڑھ رہا تھا۔ پاکستان کے سابق کپتان وسیم اکرم نے ان کو زبردست طریقے سے تنقید کا نشانہ بنایا تھا۔ وسیم اکرم نے کہا تھا کہ شعیب ملک فیئرویل میچ تو ڈیزرو نہیں کرتے لیکن ان کے لیے فیئرویل ڈنر کا انتظام ضرور کیا جا سکتا ہے۔

واضح رہے کہ اس عالمی کپ میں شعیب کی کارکردگی انتہائی خراب رہی ہے۔ اپنی بلے بازی سے وہ کوئی اثر نہیں چھوڑ پائے ہیں۔ ہندوستان کے خلاف میچ میں بھی وہ صفر پر ہی آؤٹ ہو گئے تھے۔ یک روزہ کرکٹ میں شعیب ملک نے 9 سنچری اور 44 نصف سنچری کے ساتھ 7534 رن بنائے ہیں۔ ساتھ ہی بطور گیندباز انھوں نے 158 وکٹ بھی لیے ہیں۔ ملک نے سال 1999 میں اپنا پہلا یک روزہ میچ کھیلا تھا۔