’اچھی پچ پر ٹیسٹ جیتنے کی کوشش کریں، 3 دنوں میں نہیں‘، جنوبی افریقہ کے خلاف شکست کے بعد گانگولی کا کوچ گمبھیر کو مشورہ

ہندوستان اور جنوبی افریقہ کے درمیان کولکاتہ کے ایڈن گارڈنز میں کھیلا گیا ٹیسٹ میچ 3 دنوں کے اندر ہی ختم ہو گیا۔ اس کے بعد پچ کو لے کر ایک طرح سے تنازعہ شروع ہو گیا ہے۔ حالانکہ ہندوستانی کرکٹ ٹیم کے کوچ گوتم گمبھیر نے پچ پر سوال اٹھانے سے انکار کر دیا ہے۔ ان کا کہنا ہے کہ وکٹ ویسی ہی تھی جیسا ٹیم چاہتی تھی۔ اب پچ کے متعلق کرکٹ ایسوسی ایشن آف بنگال کے صدر اور سابق ہندوستانی کپتان سوربھ گانگولی کا بیان بھی سامنے آ گیا ہے۔ انہوں نے اپنے بیان میں گوتم گمبھیر اور انتظامیہ کو ایک اہم مشورہ دیا ہے۔

سوربھ گانگولی کا کہنا ہے کہ ٹیم انتظامیہ کو اس قدر ایکطرفہ پچ بنانے کی ضرورت نہیں تھی۔ ہندوستانی ٹیم مینجمنٹ کو اپنے تیز گیند بازوں پر بھی بھروسہ رکھنا چاہیے۔ واضح رہے کہ ٹیمبا باؤما کی کپتانی والی جنوبی افریقی ٹیم نے صرف 123 رنوں کے ہدف کا دفاع کر 30 رنوں سے تاریخی جیت درج کر لی تھی۔ دوسری اننگ میں پوری ہندوستانی ٹیم 93 رنوں پر آل آوٹ ہو گئی تھی۔

بہر حال ’انڈیا ٹوڈے‘ سے بات چیت کے دوران سوربھ گانگولی نے بتایا کہ کوچ گوتم گمبھیر اور ٹیم مینجمنٹ نے ہی کیوریٹر سے اس طرح کی پچ تیار کروانے کو کہا تھا۔ گانگولی نے کہا کہ اس میں کوئی دو رائے نہیں ہے کہ یہ ایک آئیڈیل ٹیسٹ پچ نہیں تھی، لیکن ہندوستان کو 120 رن تو حاصل کر لینے چاہیے تھے۔ گمبھیر نے خود ہی کہا تھا کہ انہیں ایسی ہی پچ چاہیے اور انہوں نے کیوریٹر کو ہدایات بھی دیں تھیں۔ سوربھ گانگولی کے مطابق کوچ گمبھیر کی نگرانی میں ہندوستانی ٹیم انے ایک بار پھروہی غلطی کی جو انہوں نے نیوزی لینڈ کے خلاف 3 میچوں کی گھریلو سیریز کے دوران کی تھی۔ اس وقت بھی ہندوستان نے تینوں میچوں میں اسپن کی مددگار پچ بنوائی تھی اور ٹیم سیریز 3-0 سے ہار گئی تھی۔ ٹیم انڈیا نے اس سیریز سے کچھ نہیں سیکھا اور گزشتہ 6 گھریلو ٹیسٹ میں 4 بار شکست کا سامنا کرنا پڑا۔

واضح رہے کہ میچ کے بعد کوچ گوتم گمبھیر نے پریس کانفرنس میں مانا تھا کہ پچ بالکل ویسی ہی تھی جیسی ہندوستانی ٹیم چاہتی تھی، لیکن سوربھ گانگولی اس سے متفق نہیں ہے۔ گانگولی کا کہنا ہے کہ میں گوتم گمبھیر کی بہت عزت کرتا ہوں۔ انہوں نے ہندوستان کے لیے انگلینڈ، ونڈے اور ٹی-20 میں بہترین کارکردگی کا مظاہرہ کیا ہے۔ لیکن ہمیں اچھی اور متوازن پچوں پر کھیلنے کی ضرورت ہے۔ سوربھ گانگولی نے گمبھیر کو یہ بھی مشورہ دیا کہ وہ اپنے گیند بازوں پر بھروسہ رکھیں، خاص طور سے جسپریت بمراہ اور محمد سراج جیسے میچ جتانے والے کھلاڑی پر۔ ہمارے اسپنر بھی ٹیسٹ جتاتے ہیں، لیکن پچ کو اس قدر ایکطرفہ بنانے کی ضرورت نہیں ہے۔

سابق کپتان سوربھ گانگولی نے اخیر میں ہندوستانی ٹیم کے کوچ گوتم گمبھیر کو ایک اہم مشورہ بھی دیا۔ انہوں نے کہا کہ ’’ٹیسٹ میچ 5 دنوں میں جیتیں، تین دنوں میں نہیں۔‘‘ سوربھ گانگولی کے اس بیان سے واضح ہو گیا کہ وہ چاہتے ہیں کہ ہندوستان ایسی پچوں پر کھیلے جہاں بلے بازوں اور گیند بازوں دونوں کو برابر مواقع ملے، تاکہ کھیل دلچسپ ہو اور ٹیم متوازن حالات میں جیتنا سیکھے۔