حکومت نے شین وارن کے اہل خانہ سے کی سرکاری اعزاز کے ساتھ آخری رسومات ادا کرنے کی پیشکش

ملبورن: آسٹریلیا کے شہرہ آفاق لیگ اسپنر شین وارن کے اچانک انتقال کے بعد حکومت نے اہل خانہ سے سرکاری اعزاز کے ساتھ ان کی آخری رسومات ادا کرنے کی پیشکش کی ہے۔ شین وارن کو دنیا کا بہترین اسپنر سمجھا جاتا تھا۔ وہ جمعہ کو تھائی لینڈ میں دل کا دورہ پڑنے سے انتقال کر گئے۔ ان کی عمر 52 سال تھی۔

لیجنڈری اسپنر وارن کے انتقال پر وکٹوریہ کے وزیر اعظم ڈینیل اینڈریوز نے کہا کہ وکٹوریہ نے ایک آئیکن کھو دیا ہے۔ آسٹریلیا نے ایک لیجنڈ کھو دیا ہے۔ اسپنر کے سرتاج کے انتقال پر پوری کرکٹ کی دنیا سوگوار ہے۔ شین وارن نے کرکٹ کی نئی نسل کو متاثر کیا ہے۔ انہوں نے کہا کہ میں نے ان کے کنبہ کو سرکاری اعزاز کے ساتھ تدفین کی پیشکش کی ہے تاکہ وکٹوریہ کے لوگ ان کو خراج عقیدت پیش کر سکیں۔

ساتھ ہی آسٹریلیا کے وزیر اعظم اسکاٹ موریسن نے بھی سابق کرکٹر کو خراج تحسین پیش کیا ہے۔ موریسن نے ٹوئٹ کیا کہ ’’آسٹریلیا کے لوگ شین وارن کے انتقال کی خبر سے صدمے اور غمزدہ ہیں۔ ان کی عمر صرف 52 سال تھی۔ وارن ہمارے عظیم کھلاڑیوں میں سے ایک تھے۔ وہ ان لوگوں میں سے ایک تھے جنہوں نے ڈان بریڈمین کی طرح غیر معمولی کارنامے سرانجام دیئے۔"

وزیر اعظم نے کہا کہ ’’ان کی کامیابیاں ان کی صلاحیتں، نظم و ضبط اور کھیل کے لیے ان کے جذبے کی عکاسی کرتی ہیں، لیکن شین وارن آسٹریلیائی عوام کے لیے بہت زیادہ اعزاز کے مستحق ہیں۔ وہ عظیم کھلاڑیوں میں سے ایک تھے۔ سب ان سے پیار کرتے تھے۔ ان کے انتقال سے ہم سب کو گہرا دکھ ہوا ہے۔ کوئی سوچ بھی نہیں سکتا تھا کہ راڈ مارش کے انتقال کے اگلے دن ایسا ہوگا۔

انہوں نے کہا کہ ’’شین جیسا کوئی نہیں تھا۔ انہوں نے اپنی زندگی اپنے طریقے سے گزاری۔ ان کی کامیابیاں بے مثال تھیں۔" قابل ذکر ہے کہ کرکٹ کی دنیا کے عظیم اسپنر وارن کا جمعہ کو تھائی لینڈ میں دل کا دورہ پڑنے سے انتقال ہو گیا تھا۔