ٹی-20 عالمی کپ: کیا پاکستان بھی ٹورنامنٹ سے ہوگا باہر؟ پی سی بی چیف اور شہباز شریف کی ہوئی ملاقات

’ٹی-20 عالمی کپ 2026‘ شروع ہونے میں اب 2 ہفتہ سے بھی کم وقت رہ گیا ہے، لیکن کشمکش والے حالات ختم ہونے کا نام نہیں لے رہے ہیں۔ بنگلہ دیش کی تو اس ٹورنامنٹ سے وداعی ہو ہی گئی ہے، اب پاکستان کے نام پر سوالیہ نشان لگ گیا ہے۔ ایسے اندیشے ظاہر کیے جا رہے ہیں کہ بنگلہ دیش کی ٹورنامنٹ سے وداعی پاکستان کو پسند نہیں آئی ہے، اور وہ بھی ٹورنامنٹ کا بائیکاٹ کر سکتا ہے۔ فوری طور پر پاکستان کرکٹ بورڈ (پی سی بی) نے اپنا فیصلہ نہیں سنایا ہے، لیکن جلد ہی اس سلسلے میں کوئی اعلان ہو سکتا ہے۔

میڈیا رپورٹس کے مطابق پی سی بی چیف محسن نقوی نے پیر کے روز پاکستانی وزیر اعظم شہباز شریف سے ملاقات کی۔ اس ملاقات کے بعد انھوں نے کہا کہ ٹی-20 عالمی کپ میں حصہ لینے پر آخری فیصلہ جمعہ یا آئندہ پیر تک لیا جائے گا۔ نقوی نے سوشل میڈیا پر اس سلسلے میں تصدیق بھی کی کہ پیر کے روز وزیر اعظم شہباز شریف کے ساتھ ان کی ملاقات کے دوران ’ٹی-20 عالمی کپ 2026‘ پر تفصیلی گفتگو ہوئی۔ ’ایکس‘ پر جاری پوسٹ میں انھوں نے لکھا کہ ’’میری وزیر اعظم کے ساتھ طویل میٹنگ ہوئی اور میں نے انھیں آئی سی سی معاملہ سے متعلق جانکاری دی۔ انھوں نے ہدایت دی ہے کہ ہم سبھی متبادل پر غور کرتے ہوئے مسئلہ کا حل تلاش کریں۔‘‘ وہ یہ بھی لکھتے ہیں کہ ’’یہ طے ہوا کہ حتمی فیصلہ جمعہ یا آئندہ پیر کو لیا جائے گا۔‘‘

ذرائع کے مطابق وزیر اعظم شہباز شریف نے نقوی سے کہا ہے کہ پاکستان کو بنگلہ دیش کا خیال رکھنا چاہیے اور اس کو ہر ممکن مدد دینی چاہیے۔ پی سی بی اس معاملہ میں پہلے ہی اپنی ناراضگی ظاہر کر چکا ہے کہ آئی سی سی نے بنگلہ دیش کے مطالبہ پر غور نہ کر دوہرا رویہ اختیار کیا ہے۔ بورڈ نے قبل کے بیان میں یہ بھی کہا تھا کہ وہ عالمی کپ کا بائیکاٹ بھی کر سکتا ہے۔ اب ذرائع کے حوالہ سے سامنے آ رہی خبر میں بتایا جا رہا ہے کہ وزیر اعظم شہباز شریف کو محسن نقوی نے مختلف حالات سے واقف کرایا، جس میں پاکستان کا عالمی کپ کے لیے اپنی ٹیم نہیں بھیجنا یا ٹورنامنٹ میں حصہ نہ لینا شامل ہے۔ 15 فروری کو ہندوستان کے خلاف ہونے والے میچ کا بائیکاٹ کرنے پر بھی اس ملاقات میں بات چیت ہوئی۔