ٹی-20 عالمی کپ 2026: بنگلہ دیش آفیشیل طور پر ٹورنامنٹ سے ہوا باہر، آئی سی سی نے اسکاٹ لینڈ کو دیا موقع

آئی سی سی (انٹرنیشنل کرکٹ کونسل) نے ’ٹی-20 عالمی کپ 2026‘ سے بنگلہ دیشی ٹیم کو حتمی شکل میں باہر کرنے کا اعلان کر دیا۔ ہندوستان اور سری لنکا کی مشترکہ میزبانی میں ہونے والے اس ٹورنامنٹ سے بنگلہ دیش ٹیم کو باہر کرنے کے ساتھ ساتھ اسکاٹ لینڈ کی انٹری کا راستہ بھی ہموار ہو گیا ہے۔ یہ فیصلہ بنگلہ دیش کرکٹ بورڈ (بی سی بی) کے اس مؤقف کی وجہ سے لیا گیا، جس میں اس نے ہندوستان میں میچ کھیلنے سے انکار کر دیا تھا۔

اس ٹورنامنٹ کا آغاز فروری 2026 سے ہونا ہے اور بنگلہ دیش نے سیکورٹی وجوہات کا حوالہ دیتے ہوئے ہندوستان میں اپنے میچ نہ کھیلنے کی بات کہی تھی۔ بی سی بی نے اس معاملہ پر مسلسل سخت مؤقف اختیار کیے رکھا اور آئی سی سی سے ہندوستان کے باہر میچ منتقل کرنے کا مطالبہ کیا، حالانکہ آئی سی سی نے اس مطالبہ کو واضح الفاظ میں مسترد کر دیا۔ آئی سی سی نے کہا کہ ٹورنامنٹ کے قواعد کے مطابق تمام ٹیموں کو مقررہ مقامات پر ہی کھیلنا ہوگا۔ اس صورتحال میں آئی سی سی نے بنگلہ دیش کو ٹورنامنٹ سے باہر کرنے جیسا سخت قدم اٹھایا۔ میڈیا رپورٹس کے مطابق آئی سی سی نے بنگلہ دیش کرکٹ بورڈ کے چیئرمین کو ای میل کے ذریعہ اپنے فیصلہ سے آگاہ کر دیا ہے۔

بنگلہ دیش کی جگہ اسکاٹ لینڈ کو باضابطہ طور پر اس ٹورنامنٹ میں شامل کر لیا گیا ہے۔ اسکاٹ لینڈ کو گروپ ’سی‘ میں شامل کیا گیا ہے۔ اس گروپ میں اب انگلینڈ، ویسٹ انڈیز، نیپال، اٹلی اور اسکاٹ لینڈ کی ٹیمیں ہوں گی۔ اسکاٹ لینڈ کا انتخاب آئی سی سی ٹیم رینکنگ کی بنیاد پر کیا گیا ہے۔ وہ اُن ٹیموں میں سب سے اوپر تھی جو کوالیفائر راؤنڈ سے باہر ہو گئی تھیں۔

اسکاٹ لینڈ کی ٹیم اپنی مہم کا آغاز 7 فروری کو ویسٹ انڈیز کے خلاف کھیلے جانے والے میچ سے کرے گی۔ اس کے بعد 9 فروری کو اس کا مقابلہ اٹلی سے ہوگا، جبکہ 14 فروری کو اسکاٹ لینڈ کی ٹیم انگلینڈ سے ٹکرائے گی۔ اس کے بعد وہ اپنا آخری گروپ میچ نیپال کے خلاف کھیلے گی۔ اسکاٹ لینڈ کا یہ ساتواں ٹی-20 ورلڈ کپ ہوگا۔ اس سے قبل 6 ایڈیشنز میں اس نے مجموعی طور پر 22 میچ کھیلے ہیں اور صرف 7 میچ جیتے ہیں۔ ایسے میں اسکاٹ لینڈ کی نظر اس بڑے موقع سے فائدہ اٹھانے پر ہوگی اور وہ زیادہ سے زیادہ میچ جیتنے کی کوشش کرے گی۔