اسٹیو اسمتھ کا ونڈے کرکٹ کو الوداع، ٹیسٹ اور ٹی-20 میں بلے بازی کا جلوہ دکھاتے رہیں گے

ٹیم انڈیا کے ہاتھوں آئی سی سی چمپئنز ٹرافی کے سیمی فائنل میں شکست کھانے کے بعد آسٹریلیا کے مایہ ناز کھلاڑی اسٹیو اسمتھ نے ریٹائرمنٹ کا اعلان کر دیا ہے۔ پیٹ کمنس کی غیر موجودگی میں اسمتھ کو ٹیم کی کمان ملی تھی لیکن ان کی کپتانی میں چمپئنز ٹرافی میں آسٹریلیا کا سفر سیمی فائنل میں ہی ختم ہو گیا۔ ایسے میں ٹیم کی شکست سے مایوس اسمتھ نے ونڈے کرکٹ کو الوداع کہہ دیا۔ حالانکہ وہ ٹیم کے لیے ٹیسٹ اور ٹی-20 مقابلے کھیلتے رہیں گے۔ اسمتھ کی خواہش ہے کہ وہ ملک کے لیے اولمپک 2028 میں بھی کھیلیں۔

اسٹیو اسمتھ نے 19 فروری 2010 کو ملبورن کرکٹ گراؤنڈ پر ویسٹ انڈیز کے خلاف ونڈے میں ڈیبیو کیا تھا۔ انہوں نے 4 مارچ کو ہندوستان کے خلاف یک روزہ میچوں کی آخری اننگز کھیلی جس میں انہوں نے شاندار بلے بازی کرتے ہوئے 7 رن بنائے۔

15 سالوں کے ونڈے کیریئر میں اسمتھ نے کئی حصولیابیاں اپنے نام کیں۔ شروعاتی دنوں میں اسمتھ بلے باز کے طور پر نہیں بلکہ گیند باز کے طور پر ٹیم میں شامل کیے جاتے تھے۔ لیکن اچانک ان کی بلے بازی میں حیرت انگیز طور پر بہتری آئی اور وہ دنیا کے بہترین بلے بازوں میں شمار کیے جانے لگے۔

اسٹیو اسمتھ نے 169 ونڈے میچوں میں ٹیم کی نمائندگی کی۔ انہوں نے اس کی 153 اننگز میں کُل 5727 رن بنائے۔ ونڈے میں ان کا سب سے بڑا اسکور 164 رہا۔ اس فارمیٹ میں ان کی بلے بازی کی اوسط 43.06 رہی۔ انہوں نے 87.13 کے اسٹرائک ریٹ سے بلے بازی کی۔ اسمتھ نے ونڈے میچوں میں 12 سنچری اور 34 نصف سنچری بنائی۔ وہ 20 بار ناٹ آؤٹ میدان سے واپس ہوئے۔ انہوں نے 169 ونڈے میچوں میں 517 چوکے اور 57 چھکے لگائے۔

اسٹیو اسمتھ کے ونڈے کیریئر کی ایک خاص بات یہ بھی رہی کہ وہ دو بار عالمی کپ فاتح ٹیم کا حصہ رہے۔ 2015 اور 2023 میں جب آسٹریلیا نے ونڈے میچوں کا عالمی کپ جیتا تھا تو اسمتھ ٹیم کے اہم رکن تھے اور انہوں نے ان مقابلوں میں کئی اہم اننگز کھیل کر ٹیم کو عالمی کپ فاتح بنانے میں اہم کردار ادا کیا۔