سابق سری لنکن کرکٹر اروندا ڈی سلوا اور اہلیہ کی فوری گرفتاری کا حکم

کولمبو: سری لنکا کی ایک عدالت نے سابق کرکٹر اروندا ڈی سلوا اور ان کی اہلیہ کو فوری طور پر گرفتار کر کے عدالت میں پیش کرنے کا حکم دیا ہے۔ یہ حکم اس وقت جاری کیا گیا جب دونوں ایک مقدمے کی سماعت کے دوران عدالت میں حاضر نہیں ہوئے۔

بی بی سی سنہالا کے مطابق، کولمبو کی فورٹ مجسٹریٹ عدالت کے مجسٹریٹ پسن امرسینا نے بدھ کے روز اروندا ڈی سلوا اور ان کی اہلیہ کی گرفتاری کا وارنٹ جاری کیا۔ دونوں ایک سابق مقدمے میں پریانکا نیوما کے ضمانتی بنے ہوئے تھے اور بعد میں ضمانت کی ذمہ داری سے دستبردار ہونے کے لیے عدالت سے رجوع کیا تھا۔

پریانکا نیوما، اروندا ڈی سلوا کی اہلیہ کی جڑواں بہن ہیں اور سابق سری لنکن ایئرلائنز کے چیف ایگزیکٹو کپلا چندر سینا کی اہلیہ تھیں۔ عدالت میں اروندا ڈی سلوا اور ان کی اہلیہ کی جانب سے ضمانتی کی حیثیت سے اپنی ذمہ داری ختم کرنے کی درخواست سے متعلق معاملے کی سماعت مقرر تھی۔

رپورٹ کے مطابق، سماعت کے دوران دونوں عدالت میں موجود نہیں تھے۔ عدالت نے ان کی غیر حاضری کی وجہ بتانے کے لیے ثبوت یا وضاحت پیش نہ کیے جانے کے بعد گرفتاری کا حکم جاری کیا۔ اس موقع پر متعلقہ مقدمے میں ضمانتیوں کی جانب سے دلائل پیش کیے جانے تھے۔

خیال رہے کہ اروندا ڈی سلوا کا نام سری لنکن ایئرلائنز کے سابق چیف ایگزیکٹو کپلا چندر سینا کی موت کے معاملے میں سامنے آیا ہے۔ کپلا چندر سینا کی لاش اروندا ڈی سلوا کے گھر سے ملی تھی۔ اس معاملے کے سلسلے میں اروندا ڈی سلوا نے رواں سال 12 مئی کو فورٹ مجسٹریٹ عدالت میں گواہی دی تھی۔ بعد ازاں ان کی اہلیہ پریانگا انوشکا وجے نائکے نے بھی عدالت کے سامنے اپنا بیان ریکارڈ کرایا تھا۔